17.06.2026

O‘zbekiston Respublikasi Hisob palatasida Xitoyning Nankin audit universiteti rektori Dong Birong boshchiligidagi delegatsiya bilan uchrashuv bo‘lib o‘tdi. Mazkur uchrashuvda Buxoro davlat universiteti rektori, professor Obidjon Xamidov ham ishtirok etdi.

Uchrashuv davomida audit ta’limi, ilmiy tadqiqotlar, raqamli texnologiyalar, sun’iy intellekt hamda xalqaro akademik hamkorlik masalalari muhokama qilindi. Ta’kidlanganidek, bugungi kunda zamonaviy audit tizimi Big Data, sun’iy intellekt va raqamli boshqaruv texnologiyalari bilan uyg‘unlashib, mutlaqo yangi bosqichga ko‘tarilmoqda.

Muloqot chog‘ida Nankin audit universiteti hamda Buxoro davlat universiteti o‘rtasida yaqinda imzolangan hamkorlik shartnomasi ikki tomonlama munosabatlarni yanada rivojlantirish uchun muhim huquqiy asos bo‘lib xizmat qilishi qayd etildi.

Tomonlar talabalar va professor-o‘qituvchilar almashinuvi, qo‘shma ilmiy tadqiqotlar, akademik mobillik dasturlari hamda audit va iqtisodiyot yo‘nalishlarida zamonaviy mutaxassislar tayyorlash masalalari yuzasidan fikr almashdilar.

Xitoy delegatsiyasi rahbari Dong Birong Buxoro davlat universiteti bilan “3+1” va “4+0” formatlaridagi qo‘shma ta’lim dasturlarini yo‘lga qo‘yish, ilmiy hamkorlikni kengaytirish va yangi loyihalarni amalga oshirishga tayyor ekanligini bildirdi.

Mazkur uchrashuv Buxoro davlat universitetining xalqaro hamkorlik geografiyasini yanada kengaytirish, Xitoyning nufuzli oliy ta’lim muassasalari bilan strategik aloqalarni mustahkamlash hamda xalqaro standartlar asosida kadrlar tayyorlash tizimini rivojlantirish yo‘lidagi muhim qadam bo‘ldi.

BuxDU Axborot xizmati