17.06.2026

Toshkent davlat yuridik universitetida oliy ta’lim va ilm-fan sohasidagi o‘zaro hamkorlikni yangi bosqichga olib chiqishga bag‘ishlangan rasmiy uchrashuv bo‘lib o‘tdi. Tadbirda TDYU rektori, professor Baxshillo Xodjayev hamda Buxoro davlat universiteti rektori Obidjon Xamidov boshchiligidagi jamoa, jumladan, Inson resurslarini boshqarish departamenti boshlig'i Umida Asadova, BuxDU yuridik boʻlim boshlig’i Shuxrat Sharapov ishtirok etishdi.

Muloqot davomida ikki nufuzli universitet o‘rtasida talabalar akademik mobilligi va almashinuv dasturlarini rivojlantirish, professor-o‘qituvchilar hamda yosh tadqiqotchilarning o‘zaro tajriba almashishini tizimli yo‘lga qo‘yish masalalari muhokama qilindi. Shuningdek, zamonaviy ilmiy-uslubiy adabiyotlar va raqamli ta’lim resurslaridan birgalikda foydalanish, qo‘shma ilmiy loyihalar, xalqaro konferensiya va seminarlar tashkil etish bo‘yicha aniq vazifalar belgilab olindi. Tomonlar oliy ta’lim tizimida innovatsion yondashuvlarni joriy etish talabalar uchun sifatli ta’lim muhitini yaratishning asosiy omili ekanini alohida ta’kidladilar.

Uchrashuvning mantiqiy yakuni sifatida Toshkent davlat yuridik universiteti hamda Buxoro davlat universiteti o‘rtasida hamkorlik memorandumi imzolandi. Mazkur hujjat ta’lim, ilm-fan va amaliyot integratsiyasini kuchaytirish, yuridik va ijtimoiy-iqtisodiy sohalar uchun yuqori malakali kadrlar tayyorlash sifatini oshirishda mustahkam huquqiy asos bo‘lib xizmat qiladi. Ushbu hamkorlik ikki universitetning intellektual salohiyatini birlashtirish orqali mamlakatimiz oliy ta’lim tizimi raqobatbardoshligini yanada yuksaltirishga hissa qo‘shadi.

BuxDU Axborot xizmati