Buxoro davlat universitetida universitet rektori Obidjon Xamidov boshchiligida Yangi Oʻzbekiston universiteti vakillari bilan rasmiy uchrashuv bo‘lib o‘tdi. Unda professor Pavel Belov hamda Yangi O'zbekiston universiteti Fizika departamenti dotsenti Alisher Sanetullayev ishtirok etdi.
Mazkur tashrif O‘zbekiston Respublikasi Prezidentining 2021-yil 23-iyundagi PQ–5158-son qaroriga muvofiq tashkil etilgan “Yangi Oʻzbekiston” universitetida faoliyat yuritayotgan xorijiy professor-o‘qituvchilar va xalqaro ekspertlarning respublika oliy ta’lim muassasalariga tashriflarini yo‘lga qo‘yish tashabbusi doirasida amalga oshirildi.
Uchrashuv davomida oliy ta’lim tizimini modernizatsiya qilish, ilmiy salohiyatni oshirish hamda universitetlararo hamkorlikni yangi bosqichga olib chiqish masalalari atroflicha muhokama qilindi.
Xususan, quyidagi yo‘nalishlarga alohida e’tibor qaratildi:
— ilmiy hamkorlikni kengaytirish, fizika, muhandislik, materialshunoslik, raqamli texnologiyalar va sun’iy intellekt sohalarida qo‘shma ilmiy-tadqiqot loyihalarini amalga oshirish;
— “O‘zbekiston – 2030” strategiyasi doirasida belgilangan ustuvor vazifalardan kelib chiqib, universitetning strategik rivojlanish yo‘nalishlarini takomillashtirish hamda aniq maqsadli ko‘rsatkichlarga (KPI) erishish mexanizmlarini ishlab chiqish;
— ilmiy tadqiqot universiteti maqomini olish bo‘yicha xalqaro tajribalarni o‘rganish, yuqori impakt-faktorli jurnallarda nashrlar sonini oshirish, ilmiy maktablarni shakllantirish va grant mablag‘larini keng jalb etish;
— xalqaro grantlar va ilmiy loyihalarda ishtirok etish, qo‘shma grant arizalarini tayyorlash hamda xorijiy ilmiy markazlar bilan hamkorlikni mustahkamlash;
— zamonaviy universitet boshqaruv tizimini takomillashtirish, xususan “Yangi Oʻzbekiston” universiteti boshqaruv modelining samaradorligini tahlil qilish, akademik va ma’muriy jarayonlarni optimallashtirish;
— ta’lim sifatini oshirish, o‘quv jarayoniga raqamli texnologiyalarni keng joriy etish, zamonaviy laboratoriya infratuzilmasini rivojlantirish va amaliyotga yo‘naltirilgan ta’lim modelini kuchaytirish.
Uchrashuvda yosh tadqiqotchilarni xalqaro ilmiy hamjamiyatga integratsiya qilish, ilmiy natijalarni tijoratlashtirish va grant loyihalarini professional darajada tayyorlash masalalariga alohida urg‘u qaratildi.
Uchrashuv yakunida tomonlar qo‘shma ilmiy seminar va mahorat darslarini tashkil etish, professor-o‘qituvchilar hamda doktorantlar almashinuvini yo‘lga qo‘yish, xalqaro grant loyihalarini birgalikda ishlab chiqish hamda strategik rivojlanish bo‘yicha tajriba almashishni davom ettirish yuzasidan kelishuvga erishdilar.
Mazkur uchrashuv oliy ta’lim muassasalari o‘rtasida ilmiy hamkorlikni yanada mustahkamlash, boshqaruv samaradorligini oshirish hamda xalqaro miqyosda raqobatbardosh ilmiy-tadqiqot universitetini shakllantirish yo‘lidagi muhim qadam sifatida baholandi.
