Bugun Buxoro davlat universitetida Polsha Respublikasining “NEMO” kompaniyasi rahbari Xenrik Vidra boshchiligidagi delegatsiya qabul qilindi. Mehmonlarni Buxoro davlat universiteti rektori, iqtisodiyot fanlari doktori, professor Obidjon Xamidov qabul qildi.
Uchrashuv davomida Buxoro davlat universiteti bilan hamkorlikda maishiy va sanoat chiqindilarini qayta ishlash, ulardan energiya va yoqilg‘i (briket) olish, shuningdek, organik o‘g‘itlar va biogaz ishlab chiqarish masalalari atroflicha muhokama qilindi.
Uchrashuvda Polsha tomoni vakillari O‘zbekiston Respublikasida so‘nggi yillarda amalga oshirilayotgan izchil islohotlar natijasida mamlakat jadal sur’atlarda rivojlanib borayotganini, ushbu jarayon xalqaro hamjamiyat tomonidan ham keng e’tirof etilayotganini ta’kidladilar. Xususan, yurtimizda shakllantirilgan qulay ishbilarmonlik va investitsion muhit xorijiy investorlar uchun yangi imkoniyatlar ochayotgani alohida qayd etildi.
Tomonlar qayta tiklanuvchi energiya manbalarini rivojlantirish, zamonaviy texnologiyalarni joriy etish hamda ekologik barqarorlikni ta’minlashga qaratilgan loyihalarni birgalikda amalga oshirish bo‘yicha fikr almashdilar. Uchrashuv yakunida mazkur yo‘nalishlarda o‘zaro hamkorlikni yo‘lga qo‘yish istiqbollari belgilab olindi.
O‘z navbatida, Buxoro davlat universiteti rektori, iqtisodiyot fanlari doktori, professor Obidjon Xamidov O‘zbekiston va Polsha o‘rtasidagi hamkorlik barcha yo‘nalishlarda izchil rivojlanib borayotganini ta’kidlab, oliy ta’lim, ilmiy-tadqiqot va innovatsion faoliyat sohalarida Polsha tadbirkorlari hamda ilmiy muassasalari bilan o‘zaro manfaatli loyihalarni amalga oshirishga BuxDU doimo tayyor ekanligini bildirdi.
Xorijiy mehmonlar tomonidan chiqindilarni qayta ishlash, qayta tiklanuvchi energiya manbalaridan foydalanish hamda ekologik barqarorlikni ta’minlashga qaratilgan loyihalar yuzasidan batafsil taqdimot o‘tkazildi. Ushbu takliflar ilmiy-amaliy jihatdan muhokama qilinib, ularni ta’lim jarayoni, ilmiy izlanishlar va xalqaro hamkorlik dasturlari bilan uyg‘unlashtirish masalalariga alohida e’tibor qaratildi.
Uchrashuv yakunida BuxDU rektori mazkur tashabbuslarni yanada takomillashtirish, aniq yo‘l xaritasi asosida amaliy ishlarni boshlash hamda istiqbolda qo‘shma ilmiy loyihalar va ta’lim dasturlarini yo‘lga qo‘yishga universitet tayyor ekanligini bildirdi.
Mazkur tashrif Buxoro davlat universitetining xalqaro hamkorlik aloqalarini kengaytirish hamda “yashil iqtisodiyot” yo‘nalishidagi ilmiy-amaliy loyihalarni rivojlantirish yo‘lidagi muhim qadam bo‘ldi.
Buxoro davlat universiteti Axborot xizmati
