Buxoro shahridagi “Umid” sport majmuasida futbol bo‘yicha “Buxoro viloyati hokimi sovrini uchun” tashkil etilgan o‘rtoqlik uchrashuvi yuqori sport ruhi va murosasiz kurashlar ostida yakunlandi. Mazkur bellashuvda Buxoro davlat universitetining “BuxDU” futbol klubi hamda Peshku tumanining “Qoraqalpoq” jamoasi o‘zaro kuch sinashdi.
Uchrashuvning asosiy vaqti teng kurashlar ostida 1:1 hisobida yakunlandi. G‘olibni aniqlash uchun o‘tkazilgan penaltilar seriyasida esa BuxDU futbolchilari ustunlikni qo‘lga kiritib, g‘alabaga erishdi. Natijada musobaqa g‘olibiga Buxoro viloyati hokimi tomonidan 50 million so‘m pul mukofoti topshirildi.
Mazkur uchrashuv viloyatda kattalar futbolini rivojlantirish, iqtidorli futbolchilarni aniqlash va saralashda muhim ahamiyat kasb etdi. Sport bayrami davomida Buxoro viloyati hokimi Botir Zaripov, viloyat tashkilotlari rahbarlari, Buxoro davlat universiteti rektori Obidjon Xamidov boshchiligidagi universitet jamoasi, professor-o‘qituvchilar, xodimlar hamda talabalar oliygoh jamoasini faol qo‘llab-quvvatladilar.
Yakunida ushbu o‘rtoqlik uchrashuvi nafaqat sovrin uchun kechgan murosasiz bahs, balki yoshlar o‘rtasida sog‘lom turmush tarzini targ‘ib etish, sportga bo‘lgan qiziqishni oshirish va jamoaviy birdamlikni mustahkamlashga xizmat qilgan yorqin futbol bayrami sifatida yodda qoldi.
