Bugun Buxoro davlat universitetiga nufuzli xalqaro mehmonlar tashrif buyurishdi. BuxDU rektori, iqtisodiyot fanlari doktori, professor Obidjon Xamidov AQSh va O‘zbekiston ilm-fan hamjamiyatida yuqori obro‘-e’tiborga ega bo‘lgan mehmonlar bilan rasmiy uchrashuv o‘tkazdi.
Uchrashuvda Texas universiteti (University of Texas at Austin, AQSh) professori, xalqaro miqyosda tan olingan olim Anvar Zakhidov, buyuk jadid va ma’rifatparvar Abdulla Avloniyning munosib vorisi, jamoat arbobi Jamshid Avloniy, ikki o‘lchamli materiallar va ularning elektron hamda optoelektronik ilovalardagi geterotuzilmalarini nazariy o‘rganish yo‘nalishi bo‘yicha Sejong Universiteti yetakchi olimi Suklyun Hong, shuningdek, bir qator xorijiy va mahalliy ilmiy doira vakillari ishtirok etdi.
Ma’lumot uchun: University of Texas at Austin nufuzli QS World University Rankings reytingida TOP–100 oliy ta’lim muassasalari qatoridan munosib o‘rin egallab kelmoqda. Ushbu universitet ilm-fan, innovatsiya va texnologiyalar sohasida yetakchi ilmiy maktablardan biri hisoblanadi.
Rasmiy uchrashuv davomida:
xalqaro ilmiy-akademik hamkorlikni yanada mustahkamlash,
qo‘shma ilmiy tadqiqotlar va innovatsion loyihalarni amalga oshirish,
professor-o‘qituvchilar va talabalar uchun akademik almashinuv dasturlarini yo‘lga qo‘yish,
shuningdek, jadid bobolarimizning ma’rifatparvarlik g‘oyalari va milliy tafakkur merosini zamonaviy ta’lim tizimiga integratsiya qilish kabi muhim strategik masalalar muhokama qilindi.
