Buxoro davlat universiteti huzurida tashkil etilgan “Robots and Kids” maktabgacha ta’lim tashkilotining tantanali ochilish marosimi bo‘lib o‘tdi. Tadbirda Buxoro viloyati hokimi Botir Zaripov, Buxoro viloyati Ichki ishlar boshqarmasi boshlig‘i polkovnik Ikromjon Tursunov, Buxoro viloyati prokurori, adliya katta maslahatchisi Ulug‘bek Xamdamov, viloyat hokimining yoshlar siyosati, ijtimoiy rivojlantirish va ma’naviy-ma’rifiy ishlar bo‘yicha o‘rinbosari Baxtiyor Adilov, ichki ishlar organlari faxriylari, hamkor tashkilotlar vakillari, tuman hokimligi mutasaddilari hamda Buxoro davlat universiteti talabalari ishtirok etdilar.
Ochilish marosimida so‘zga chiqqan viloyat hokimi zamonaviy texnologiyalar, xususan sun’iy intellekt jadal rivojlanayotgan bugungi davrda bunday innovatsion bog‘chaning tashkil etilishi muhim ahamiyat kasb etishini ta’kidladi.
“Bugungi kunda dunyoda sun’iy intellekt jadal sur’atlar bilan rivojlanmoqda. Ana shunday davrda bolalarda zamonaviy bilim va ko‘nikmalarni erta yoshdan shakllantirishga xizmat qiladigan bog‘chalarning ochilishi quvonarli hol. Shu bilan birga, biz o‘zbekona urf-odatlarimiz, milliy qadriyatlarimiz va madaniyatimizni unutmasligimiz lozim. Buxoro davlat universiteti talabalariga ilm olish yo‘lida zafarlar tilayman va barchangizni kirib kelayotgan Yangi yil bilan samimiy tabriklayman” dedi viloyat hokimi Botir Zaripov.
Tadbir davomida mehmonlar bog‘chaning ta’lim-tarbiya jarayonlari, yaratilgan sharoitlar, xavfsizlik talablari hamda innovatsion yondashuvlar bilan yaqindan tanishdilar. Shuningdek, bolajonlarga yangi yil sovg‘alari taqdim qilindi.
Ma'lumot uchun, “Robots and Kids” bolalar bog‘chasida 3 yoshdan boshlab 11 ta fan bo‘yicha ta’lim beriladi. 50 o'ringa moslashtirilgan. Ta’lim jarayoni mualliflik asosida ishlab chiqilgan zamonaviy metodika orqali olib borilib, bolalarda nafaqat bilim, balki fikrlash, tahlil qilish va ijodkorlik ko‘nikmalari rivojlantiriladi.
Bog‘chada bolalar quyidagi yo‘nalishlar bo‘yicha bilim va ko‘nikmalarga ega bo‘ladilar:
o‘qish va yozish;
tanqidiy va mantiqiy fikrlash;
robototexnika va muhandislik asoslari;
arxitektura va dizayn;
gimnastika va jismoniy rivojlanish;
matematika va ingliz tili (o‘yin orqali).
Har bir bolaning ruhiy holati va individual rivoji doimiy e’tiborda bo‘lib, bog‘chada malakali psixologlar, logopedlar va mutaxassislar tizimli faoliyat olib boradi. Ertak terapiyasi, kreativ o‘yinlar va tajribaviy mashg‘ulotlar orqali bolalarning ichki dunyosi va hissiy barqarorligi mustahkamlanadi.
Shuningdek, bolalar:
robototexnika va LEGO-konstruktorlik,
musiqa va raqs,
bolalar yogasi va Baby Fitness,
“Arxitektura va dizayn” kursi orqali maketlar yaratish
bilan shug‘ullanadilar.
Bog‘chada ota-onalar uchun onlayn videokuzatuv, kuniga 3 mahal sog‘lom ovqatlanish, xavfsiz va mehrga boy muhit yaratilgan.
Mazkur “Robots and Kids” maktabgacha ta’lim tashkiloti nafaqat innovatsion ta’lim maskani, balki Buxoro davlat universiteti bitiruvchilari va talabalari uchun real bandlik maydoni ham hisoblanadi. Xususan, ushbu MTTda BuxDU bitiruvchilari, 3–4-bosqich talabalari, psixologiya, robototexnika, maktabgacha ta’lim yo‘nalishi bitiruvchilari, BuxDU Robototexnika markazi a’zolari ishga qabul qilinib, 20 dan ortiq yangi ish o‘rni yaratildi.
Ta’lim-tarbiya jarayoni zamonaviy pedagogik va innovatsion metodikalar asosida olib borilib, bolalarda nafaqat bilim va texnologik ko‘nikmalar, balki Vatanga muhabbat, milliy qadriyatlarga hurmat va mustaqil fikrlash fazilatlari shakllantiriladi. Ushbu tashabbus Uchinchi Renessans poydevorini maktabgacha ta’limdan boshlash, ilmli, tafakkuri teran va zamonaviy fikrlaydigan avlodni voyaga yetkazish yo‘lidagi muhim qadamlardan biridir.
“Robots and Kids” MTT yosh avlodni zamonaviy bilimlar bilan birga milliy qadriyatlar ruhida tarbiyalashga xizmat qiladigan muhim maskan bo‘lishi bilan ahamiyatlidir.
