UI GreenMetric tomonidan e’lon qilingan 15-yillik xalqaro reytingda joriy yil 105 davlatdan 1 745 ta universitet ishtirok etdi. Mazkur reyting oliy ta’lim muassasalarining barqaror rivojlanish bo‘yicha infratuzilmasi, siyosati va tashabbuslarini baholovchi dunyodagi eng yirik va nufuzli global tizim hisoblanadi.
Reytingning asosiy maqsadi — universitetlarni ekologik barqarorlikka oid siyosat va faoliyatga jiddiy e’tibor qaratishga undash, jumladan: global iqlim o‘zgarishi, toza energiya, suv resurslaridan oqilona foydalanish, chiqindilarni boshqarish, yashil transport, shuningdek, ta’lim va ilmiy tadqiqotlarda barqarorlik tamoyillarini kuchaytirishdir. Joriy yilda “Oliy ta’limda barqaror taraqqiyot maqsadlarini ilgari surish: maqsadlar va muassasalar tajribasi” mavzusi asosiy yo‘nalish sifatida belgilandi.
O‘zbekiston ta’lim muassasalari reytingda faol ishtirok etdi: 79 ta oliy ta’lim muassasasi qatnashdi va ulardan 38 tasi dunyoning TOP-1000 taligiga kirdi. Bu ko‘rsatkich mamlakatimiz OTMlarida barqaror rivojlanish bo‘yicha olib borilayotgan islohotlar samaradorligini yaqqol namoyon etadi. Universitetlar quyidagi 6 mezon asosida baholandi: transport, suvdan foydalanish, chiqindilarni boshqarish, infratuzilma va yashil hududlar, energiya va iqlim o‘zgarishi, ta’lim va tadqiqotlar.
2025-yilning O‘zbekistonda “Atrof-muhitni asrash va ‘yashil’ iqtisodiyot yili” deb e’lon qilingani bilan uyg‘un holda, OTMlarimizning UI GreenMetric reytingidagi ishtiroki global ekologik tashabbuslarga hamohang ravishda davom etmoqda.
Mazkur tadbir doirasida Buxoro davlat universiteti rektori Obidjon Xamidov, UI GreenMetricning O‘zbekistondagi koordinatori sifatida so‘zga chiqib, mamlakatimiz OTMlarining ekologik barqarorligini oshirish bo‘yicha yangi tashabbuslarni ilgari surdi. Kelgusi yilda BuxDU boshchiligida tayyorgarlik ishlari yanada takomillashtirilib, O‘zbekiston universitetlarining Yashil reytingdagi ko‘rsatkichlari oshirilishi rejalashtirilmoqda.
