Buxoro davlat universitetining kichik majlislar zalida xalqaro miqyosdagi nufuzli mehmon Rafael Nektalov ishtirokida keng qamrovli ilmiy-madaniy uchrashuv bo‘lib o‘tdi. Ushbu tadbir Buxoro shahrining jahon sivilizatsiyasidagi o‘rni, mintaqada millatlararo bag‘rikenglik an’analarini ilmiy asoslash hamda madaniy diplomatiyani rivojlantirishga qaratildi.
Uchrashuvda viloyat hokimi o‘rinbosari B.Z. Shaxriyorov, universitet rektori O.X. Xamidov, universitetning ilmiy ishlar va innovatsiyalar bo‘yicha prorektori K.A. Samiyev, taniqli tarixchi olim R.V. Almeyev, Arxeologiya va Buxoro tarixi kafedrasi professori H.H. To‘rayev, Musiqa ijrochiligi va madaniyat kafedrasi mudiri T.I. Rajabov, kafedra dotsenti E.R. Artikov, Xalqaro hamkorlik departamenti boshlig‘i Sh.X. Sharofiddinov hamda Tarix va yuridik, san’atshunoslik va pedagogika, filologiya fakultetlarining professor-o‘qituvchilari va talaba-yoshlari faol ishtirok etdilar.
Muloqotning asosiy diqqat markazida 2026-yilning fevral oyiga belgilangan ikki yirik xalqaro loyiha muhokamasi turdi. Xususan, “Buxoro yahudiylarining mintaqaning ijtimoiy-iqtisodiy va madaniy hayotidagi roli” mavzusidagi xalqaro ilmiy-amaliy konferensiya hamda o‘zbek san’atining durdonasi hisoblangan “Buxoro shashmaqomi kechasi” tadbirlarini yuqori saviyada tashkil etish bo‘yicha konseptual takliflar ko‘rib chiqildi.
Yig‘ilish davomida soha mutaxassislari tomonidan konferensiyaning ilmiy ko‘lamini kengaytirish, Nyu-Yorkdagi Buxoro yahudiylari hamjamiyati bilan hamkorlikda yangi arxiv manbalarini o‘rganish hamda Shashmaqom san’atining xalqaro miqyosdagi targ‘ibotini kuchaytirish yuzasidan aniq chora-tadbirlar belgilab olindi.
Mazkur uchrashuv Buxoroning bebaho madaniy va ilmiy merosini jahon jamoatchiligiga yangicha talqinda yetkazish yo‘lidagi muhim platforma bo‘lib xizmat qiladi.
