Buxoro viloyati hokimining yoshlar siyosati, ijtimoiy rivojlantirish va ma’naviy-ma’rifiy ishlar bo‘yicha o‘rinbosari Baxtiyor Adilov hamda Buxoro davlat universiteti rektori, iqtisodiyot fanlari doktori, professor Obidjon Xamidov boshchiligidagi universitet mas'ullari 1-6 talabalar turar joyi va yangidan davlat-xususiy sheriklik asosida qurilgan 9-talabalar turar joyida yaratilgan sharoitlarni ko'zdan kechirishdi. Tashrif davomida talabalar uchun yaratilgan barcha shart-sharoitlar: besh tashabbus xonalari, talabalar yotoqxonaga kirish-chiqish joylari, o‘quv va dam olish maskanlari, sport va maishiy infratuzilma bilan tanishtirildi.
Shuningdek, Baxtiyor Adilov va Obidjon Xamidov talabalar turar joyida istiqomat qilayotgan imkoniyati cheklangan talabamiz Aleksandra Isxakova bilan ham uchrashib, uning ta’lim jarayonidagi ishtiroki, qo‘shimcha yordam va qo‘llab-quvvatlash mexanizmlari haqida suhbatlashdilar. Uchrashuvda Aleksandraga xorijiy tillarni o‘rganish, maxsus moslashtirilgan o‘quv jarayonlarida ishtirok etish hamda reabilitatsion va ijtimoiy moslashuv jarayonlarini yanada yaxshilash borasida qo‘shimcha sharoitlar yaratish masalalari ko‘rib chiqildi.
Universitetda inklyuziv ta’lim tizimini rivojlantirish, imkoniyati cheklangan talabalarning o‘z qobiliyatlarini to‘liq namoyon etishi, teng ta’lim olish imkoniyatiga ega bo‘lishi uchun zarur infratuzilma, psixologik-pedagogik ko‘mak va moslashtirilgan o‘quv resurslari joriy etilyapti. Suhbat davomida ushbu yo‘nalishdagi ishlar yanada takomillashtirilishi uchun tavsiyalar berildi.
Mazkur tashrif natijalari talabalarning tahsil jarayonini yanada qulay, samarali va imkoniyatlarga boy ta’lim muhiti bilan ta’minlashga xizmat qiladi.
