O‘zbekiston Respublikasi Oliy ta’lim, fan va innovatsiyalar vazirligining 2024-yil 27-dekabrdagi tegishli hay’at qaroriga muvofiq, 2025-yil 1–2 noyabr kunlari Buxoro davlat universiteti rahbar-xodimlari hamda talaba-yoshlari uchun Toshkent shahriga sayohat tashkil etildi. Mazkur sayohatning asosiy maqsadi - talabalarning ilmiy, ma’naviy va madaniy salohiyatini oshirish, shuningdek, poytaxtimiz Toshkentda joylashgan yetakchi oliy ta’lim muassasalari, ilmiy markazlar hamda tarixiy-madaniy obidalar bilan yaqindan tanishtirishdan iborat bo‘ldi.
Sayohat davomida ishtirokchilar “Adiblar xiyoboni”, O‘zbekiston Respublikasi Bosh prokuraturasi huzuridagi “O‘zbekiston prokuraturasi tarixi muzeyi” hamda O‘zbekiston Respublikasi Vazirlar Mahkamasi huzuridagi “Qatag‘on qurbonlari xotirasi” davlat muzeyiga tashrif buyurdilar. Sayohatda Buxoro davlat universitetining Yoshlar masalalari va ma’naviy-ma’rifiy ishlar bo‘yicha birinchi prorektori Dilshod Yavmutov, O‘quv ishlari bo‘yicha prorektori Rustam Jumayev hamda universitet jamoasi faol ishtirok etdilar.
Mazkur tashriflar davomida talaba-yoshlar O‘zbekistonning boy tarixi, adabiy merosi va og‘riqli, ammo ibratli tarixiy davrlar bilan bog‘liq haqiqatlar haqida chuqur bilim va tasavvurlarga ega bo‘ldilar. Ushbu jarayon ularning ma’naviy dunyoqarashini kengaytirish, vatanparvarlik tuyg‘ularini mustahkamlash va tarixiy xotirani e’zozlash ruhida tarbiyalanishlariga xizmat qildi.
