Samarqandda davom etayotgan O‘zbekiston va Yaponiya oliy ta’lim muassasalari rektorlarining V forumi doirasida “University to University” (U2U) uchrashuvlari tashkil etildi. Mazkur uchrashuvlarda Buxoro davlat universiteti rektori, iqtisodiyot fanlari doktori, prof. Obidjon Xamidov hamda BuxDU Xalqaro hamkorlik departamenti boshlig'i Sh.X.Sharofiddinov Yaponiyaning nufuzli Kyoto xorijiy fanlar universiteti vice-prezidenti professor Kondo Naoki bilan uchrashuv o‘tkazdilar.
Suhbat chog‘ida tomonlar ikki oliy ta’lim muassasasi o‘rtasida o‘zaro hamkorlikni yo‘lga qo‘yish masalalarini muhokama qildilar. Jumladan, Buxoro davlat universitetida yapon tilini ikkinchi xorijiy til sifatida o‘qitish maqsadida malakali yapon tili o‘qituvchisini jalb etish, shuningdek, professor-o‘qituvchilar va talabalar almashinuv dasturlarini tashkil etish bo‘yicha kelishuvga erishildi.
Mazkur uchrashuv O‘zbekiston va Yaponiya o‘rtasidagi ta’lim sohasidagi strategik hamkorlikni yanada rivojlantirish, shuningdek, Buxoro davlat universitetining xalqaro ta’lim makonidagi nufuzini oshirish yo‘lidagi muhim qadamlardan biri sifatida e’tirof etildi.
Ma’lumot o‘rnida:
Kyoto xorijiy fanlar universiteti Yaponiya oliy ta’lim tizimidagi yetakchi ilmiy markazlardan biri bo‘lib, xorijiy tillar va madaniyatlar bo‘yicha chuqur ixtisoslashgan. Universitet xalqaro hamkorlikni kengaytirish, talabalar almashinuvini qo‘llab-quvvatlash va o‘zaro ilmiy-tadqiqot faoliyatini rivojlantirishda faol ishtirok etadi.
