2025-yil 13–19-oktyabr kunlari Buxoro davlat universitetining zamonaviy “UNIVERSAL” sport majmuasida O‘zbekiston Ichki ishlar vazirligi, Markaziy Osiyo Voleybol assotsiatsiyasi (CAVA) va O‘zbekiston Voleybol federatsiyasi hamkorligida “CAVA College University Volleyball Championship 2025” xalqaro musobaqasi o‘tkazildi.
Bir hafta davom etgan ushbu nufuzli chempionatda Markaziy Osiyo mamlakatlari oliy ta’lim muassasalarining 9ta jamoasi — eng kuchli, iqtidorli talabalari sog‘lom raqobat, do‘stlik va hamkorlik muhitida bellashdilar. Turnirning barcha o‘yinlari Buxoro davlat universitetining zamonaviy “UNIVERSAL” sport majmuasida o‘tkazildi.
Musobaqaning asosiy maqsadi — yoshlar o‘rtasida sog‘lom turmush tarzini targ‘ib etish, sport madaniyatini rivojlantirish, shuningdek, Markaziy Osiyo mamlakatlari oliy ta’lim muassasalari o‘rtasida do‘stlik rishtalarini mustahkamlashdan iborat bo‘ldi.
Musobaqa yakuniga ko‘ra, Buxoro davlat universiteti qizlar va yigitlar jamoalari ajoyib natijalarni qayd etib, har ikki yo‘nalishda ham chempionlikni qo‘lga kiritdi.
Ayollar o‘rtasida:
1-o‘rin — Buxoro davlat universiteti
2-o‘rin — Turkmaniston terma jamoasi
3-o‘rin — Urganch davlat universiteti
Erkaklar o‘rtasida:
1-o‘rin — Buxoro davlat universiteti
2-o‘rin — Turkmaniston jamoasi
3-o‘rin — Xalqaro innovatsion universitet (Qashqadaryo viloyati)
Final uchrashuvlari nihoyatda murosasiz, yuqori sport mahorati va kuchli raqobat ruhida kechdi. Ayniqsa, BuxDU qizlar jamoasining Turkmaniston termasiga qarshi o‘yini sport ixlosmandlari tomonidan katta qiziqish bilan kuzatildi.
Musobaqa davomida sportchilar fidoyilik, jamoaviy uyg‘unlik va iroda namunalarini namoyish etdilar. Ularning har bir o‘yini talabalik, do‘stlik va sport ruhining yuksak ifodasiga aylandi.
Musobaqaning ochilish marosimida Buxoro viloyati hokimi Botir Zaripov, viloyat huquqni muhofaza qiluvchi organlar rahbarlari, sport federatsiyalari vakillari, shuningdek, chet el delegatsiyalari ishtirok etdilar. Tadbir davomida yosh sportchilarga omad tilanib, BuxDU tomonidan yaratilgan sharoitlar yuksak e’tirof etildi.
Musobaqaning yakuniy marosimida g‘olib va sovrindorlarga diplom, kubok hamda esdalik sovg‘alari topshirildi.
