2025-yil 18-oktyabr kuni Buxoro viloyati Qorako‘l tumanida joylashgan Buxoro davlat universiteti qoshidagi Qorako‘l akademik litseyning 35 yillik yubileyiga bag‘ishlangan ilmiy-amaliy konferensiya bo‘lib o‘tdi. Tadbir O‘zbekiston Respublikasi Oliy ta’lim, fan va innovatsiyalar vazirligi hamda Buxoro davlat universiteti tashabbusi bilan tashkil etildi.
Mazkur anjumanda Buxoro davlat universitetidan Yoshlar masalalari va ma’naviy-ma’rifiy ishlar bo‘yicha prorektor Dilshod Yavmutov, Ilmiy tadqiqot va innovatsion faoliyatni rivojlantirish departamenti boshlig‘i Otabek Qahhorov hamda O‘quv-uslubiy departament boshlig‘i Suhrob Davlatov ishtirok etdilar.
Tadbir davomida universitet vakillari Oliy ta’lim, fan va innovatsiyalar vaziri nomidan yuborilgan tabriknomani marosim ishtirokchilariga yetkazdilar. Shuningdek, ular Buxoro davlat universiteti rektori Obidjon Xamidov nomidan litsey jamoasiga samimiy tabrik so‘zlarini ham yetkazdilar.
Konferensiyada shuningdek, o‘z ma’ruzasi bilan Buxoro davlat universiteti Differensial tenglamalar kafedrasi professori, V. Romanovskiy nomidagi Matematika instituti Buxoro bo‘linmasi boshlig‘i professor Durdimurod Durdiyev ham qatnashdi. U o‘z ma’ruzasida litsey ta’lim tizimida matematika fanining o‘rni, iqtidorli yoshlarni aniqlash va ularni oliy ta’limga yo‘naltirish masalalariga to‘xtalib o‘tdi.
Konferensiya davomida Qorako‘l akademik litseyi faoliyatining 35 yillik taraqqiyot yo‘li, yillar davomida erishilgan yutuqlar, faxrli bitiruvchilarning muvaffaqiyatlari hamda hozirgi avlod o‘quvchilarining ijodiy chiqishlari namoyish etildi.
Tadbir doirasida mehmonlar uchun litsey muzeyi, kutubxonasi, o‘quv xonalari va laboratoriyalariga sayohat tashkil etildi. Shuningdek, o‘qituvchilar bilan uchrashuvlar, sport musobaqalari hamda madaniy-ma’naviy tadbirlar o‘tkazildi.
Yubiley yakunida mehmonlar litsey jamoasi bilan samimiy muloqotda bo‘lib, ta’lim-tarbiya jarayonini yanada takomillashtirish va kelgusidagi hamkorlik istiqbollari muhokama qilindi.
So‘nggi o‘ttiz besh yil davomida Qorako‘l akademik litseyi mamlakatimiz ta’lim tizimida o‘zining o‘rni va nufuziga ega bo‘lgan ilg‘or ta’lim maskanlaridan biriga aylandi. Litsey jamoasi tomonidan yuksak saviyada olib borilgan uzluksiz mehnat, yangilikka intilish va sadoqat natijasida bugun bu dargoh yurtimiz faxriga aylangan ko‘plab yoshlarni voyaga yetkazdi.
Litsey faoliyatining yillar davomida erishgan yutuqlari tahsinga loyiq. Xususan, xalqaro va respublika miqyosida o‘tkazilgan fan olimpiadalarida 1 ta oltin, 22 ta kumush va 37 ta bronza medallariga sazovor bo‘lgan. So‘nggi besh yillikda bitiruvchilarning 97 foizdan 100 foizgacha oliy ta’lim muassasalariga kirish ko‘rsatkichi qayd etilgan. 2024-yilda 96 nafar bitiruvchidan 44 nafari a’lo darajali diplom bilan tamomlagan bo‘lib, 7 nafari oltin va 7 nafari kumush medallar bilan taqdirlangan. 2025-yilda esa 160 nafar bitiruvchi a’lo darajali diplom, 44 nafari oltin va 16 nafari kumush medalga ega bo‘ldi.
Litsey o‘quvchilari orasidan so‘nggi ikki yil ichida 15 nafar “Rektor stipendiyasi” sohibi, 20 nafar “Litsey iftixori” stipendiyasi g‘oliblari yetishib chiqdi. Shuningdek, 35 yil davomida yetishgan fan doktorlari, ilmiy tadqiqotchilar va yetakchi mutaxassislar mazkur ta’lim maskanining sharafli tarixini boyitib kelmoqda.
Bugungi kunda litsey o‘qituvchilari ta’lim jarayoniga innovatsion yondashuvlar, zamonaviy pedagogik metodlar va ilg‘or xalqaro tajribalarni tatbiq etish orqali yoshlarning tafakkuri va salohiyatini yanada rivojlantirmoqda.
Ushbu muhim sana — 35 yillik yubiley — nafaqat litsey jamoasi, balki butun ta’lim tizimimiz uchun faxrli tarixiy voqea bo‘lib, u xalqimizning bilim va ma’rifatga bo‘lgan e’tiborining yorqin ifodasidir.
