Buxoro davlat universitetida Hindiston Respublikasining O‘zbekistondagi Favqulodda va Muxtor Elchisi Smita Pant xonim ishtirokida uchrashuv bo‘lib o‘tdi. Tashrif davomida elchi BuxDU rektori Obidjon Xamidov boshchiligidagi universitet rahbariyati bilan uchrashib, ikki davlat o‘rtasidagi ilmiy-ta’limiy hamkorlik istiqbollari, talabalar almashinuvi, til va madaniyat sohalarida qo‘shma loyihalarni amalga oshirish masalalarini muhokama qildi.
Smita Pant xonim Buxoro davlat universitetining moddiy-texnik bazasi, zamonaviy o‘quv xonalari, ofis registrator, talabalarning ta’lim olishi uchun yaratilgan sharoitlar bilan yaqindan tanishdi. Shuningdek, uchrashuv davomida Hindiston oliy ta’lim muassasalari bilan BuxDU o‘rtasida qo‘shma dasturlar, stajirovkalar va madaniy almashinuvlarni rivojlantirishga qaratilgan tashabbuslar ilgari surildi. Tadbir yakunida tomonlar o‘zaro do‘stona aloqalarni yanada mustahkamlash va ilmiy hamkorlikni kengaytirish borasida o‘zaro fikr almashdilar.
