Hurmatli o'qituvchi va murabbiylar!
Sizlarni yurtimizda keng nishonlanayotgan 1-oktabr – O'qituvchi va murabbiylar kuni munosabati bilan Buxoro davlat universiteti jamoasi nomidan samimiy tabriklayman!
O‘qituvchi – bu shunchaki kasb emas, balki eng ulug‘ va mas’uliyatli burchdir. Sizlar kelajagimiz poydevorini qo‘yadigan, yosh avlodni komillikka yetaklaydigan, qalblarga ilm va ma’rifat nurini singdiradigan fidoyi insonlarsiz. Yurtimiz taraqqiyoti, jamiyatimiz ma’naviy yuksalishi va yoshlarimizning baxtli kelajagi, eng avvalo, sizlarning mehnatlaringiz bilan chambarchas bog‘liq.
Prezidentimiz ta’kidlaganlaridek, bugungi kunda ilm-ma’rifat va tarbiya eng ustuvor sohalardan biriga aylangan. Shu bois o‘qituvchining jamiyatdagi o‘rni, maqomi va mas’uliyati yanada ortmoqda. Sizlarning fidoyiligi va mehnatkashligi tufayli Buxoro davlat universitetida ham bilim va ma’rifat bayrog‘i baland ko‘tarilmoqda, yoshlarimiz yurtimizning eng muhim islohotlariga faol hissa qo‘shmoqda.
Aziz ustozlar!
Sizlarning har bir darsda aytgan hikmatli so‘zlaringiz, bergan saboqlaringiz, tarbiyaviy ko‘rsatmalaringiz yoshlar qalbida umrbod iz qoldiradi. Shogirdlaringizning muvaffaqiyati – sizlarning eng katta yutug‘ingiz, xalqimizning faxru g‘ururidir.
Bugun sizlarga mustahkam sog‘liq, xonadonlaringizga fayzu baraka, yurtimiz kelajagini yaratayotgan yoshlarga esa sizlardan o‘rnak olib, ilmli, irodali, vatanparvar bo‘lishlarini tilayman. Sizlarning doimiy izlanishingiz, sabr-toqatingiz va mehr-muhabbatingiz tufayli Vatanimizning kelajagi yanada porloq bo‘lishiga ishonaman.
Bayramingiz muborak bo‘lsin, aziz o'qituvchi va murabbiylar!
Obidjon Xamidov
O'zLiDeP Buxoro viloyati Kengashi raisi, xalq deputatlari viloyat Kengashi deputati, Xalq deputatlari viloyat Kengashining mahalliy byudjet, tadbirkorlikni rivojlantirish va iqtisodiy islohotlar masalalari bo‘yicha doimiy komissiyasi raisi, Buxoro davlat universiteti rektori iqtisodiyot fanlari doktori, professor
