Buxoro davlat universiteti rektori, iqtisodiyot fanlari doktori, professor Obidjon Xamidov 2025-yil 22–27-sentyabr kunlari Rossiya Federatsiyasining Sankt-Peterburg davlat iqtisodiyot universitetida bo‘lib o‘tayotgan “Yevrosiyo iqtisodiy istiqbollari” xalqaro simpoziumida rais sifatida ishtirok etmoqda.
Shu munosabat bilan, BuxDU rektori Obidjon Xamidov O'zbekiston Respublikasi Prezidenti Sh.M.Mirziyoyevning respublikamizda turizmni rivojlantirishga qaratilgan PQ-135 va PQ-216 sonli qarorlari bo'yicha yaratilgan imtiyozlar yuzasidan ma'lumotlar berib o'tib, shuningdek, mazkur oliygohning faxriy professori sifatida universitet professor-o‘qituvchilari, rahbariyati va talabalari ishtirokida uchrashuv o‘tkazdi. Tadbir davomida u O‘zbekistondagi investitsion imkoniyatlar, iqtisodiy hamkorlik istiqbollari hamda turizm sohasining rivoji borasida batafsil ma’ruza qildi.
Sankt-Peterburg davlat iqtisodiyot universiteti (SPbGEU) — Rossiyaning yetakchi iqtisodiy ta’lim maskanlaridan biri bo‘lib, 1930-yilda tashkil etilgan. Bugungi kunda universitet 50 mingdan ortiq talabaga ta’lim berib, iqtisodiyot, menejment, moliya, marketing va xalqaro aloqalar sohalarida kuchli ilmiy salohiyatga ega. Universitet Rossiya hamda xorijdagi ko‘plab nufuzli oliy ta’lim muassasalari bilan hamkorlik qilib kelmoqda.
Mazkur uchrashuv ikki oliygoh o‘rtasidagi ilmiy-ta’limiy hamkorlikni yanada rivojlantirish, yangi loyihalarni amalga oshirish va o‘zaro tajriba almashinuvini kengaytirishda muhim ahamiyat kasb etadi.
