Milliy g‘ururimiz va davlatchiligimiz tayanchi bo‘lgan Buxoro bugun tarixiy voqeaga — ilk xalqaro Buxoro biennalesiga mezbonlik qilmoqda. Bu nafaqat san’at ahli, balki butun yurtimiz uchun katta sharaf va mas’uliyatdir. Chunki Buxoro ko‘hna davrlardan beri Sharq uyg‘onishining markazi, madaniyat, ilm-fan va ijodiy tafakkurning beqiyos maskani sifatida e’tirof etib kelinadi.
Birinchi Buxoro biennalesi bizning ko‘p asrlik tariximizni, ajdodlardan qolgan an’analarni va asrab-ardoqlanayotgan hunarmandchiligimizni keng namoyish etadigan o‘ziga xos maydondir. Unda rassomlar, hunarmandlar, oshpazlar va shoirlar qadimiy obidalarni nafislik, navo va milliy qadriyatlar ruhi bilan boyitmoqda. Bu maskan bugun san’at va hayotning o‘zaro uyg‘unlashgan maydoniga aylanganini ko‘rib barchamiz g‘ururlanamiz.
Mazkur yirik tadbir xalqaro hamjamiyatda katta qiziqish uyg‘otmoqda. Buxoro bugun jahonning turli burchaklaridan kelgan ijodkorlarni birlashtirib, san’atni qadrlovchi va teran his qiluvchi makon sifatida e’tirof etilmoqda. Bu esa mamlakatimizning madaniy nufuzini yanada yuksaltirib, eng iste’dodli san’atkor va hunarmandlarni O‘zbekistonga jalb etmoqda.
Biennale doirasida taqdim etilgan “AlMusalla” loyihasi alohida e’tibor va faxrga loyiq. Dastlab Jidda shahridagi Islom san’ati biennalesida namoyish qilingan ushbu loyiha endilikda Buxoroning ma’naviy markazi hisoblangan Kalon masjidi yonida yangi qiyofada gavdalanmoqda. Bu maskan o‘tmish va bugunning uyg‘unlashgan ramzi sifatida mushohada va osudalikka chorlaydi. Ayniqsa, “Diriyah Biennale Foundation” va ushbu tashabbusni amalga oshirishga hissa qo‘shgan hamkorlarning qo‘llab-quvvatlashi natijasida O‘zbekiston ushbu installyatsiyani madaniy merosning bir qismi sifatida qabul qilgan ilk mamlakat bo‘ldi. Buxoro esa — uning qayta jonlangan manziliga aylandi.
Azizlar, Buxoro — butun insoniyatning mulki, jahon sivilizatsiyasi tarixida beqiyos o‘rin tutgan shahar. Asrlar davomida bu zaminda masjid gumbazlaridan tortib ipak gilamlar, zardo‘zlik, miniatyura, yog‘och o‘ymakorligi va shashmaqom musiqasigacha bo‘lgan san’at xazinalari yaratilgan. Bu boy meros nafaqat o‘z xalqimiz, balki butun dunyo uchun bebaho qadriyatdir. Shunday xazina bag‘rida ilk biennalening o‘tkazilishi tabiiy voqea bo‘lishi bilan birga, tarixiy zarurat hamdir.
Bugungi kunda madaniyat biz uchun faqatgina go‘zallik va ilhom manbai emas, balki mamlakatimizning xalqaro miqyosdagi qiyofasini belgilovchi, uning obro‘-e’tiborini oshiruvchi strategik resursdir. San’at orqali biz milliy o‘zligimizni namoyon etamiz, xalqlar o‘rtasida muloqot ko‘prigini quramiz, yosh avlodni esa ijodkorlik va yangicha tafakkur sari ruhlantiramiz. Shu jihatdan qaraganda, Buxoro biennalesi O‘zbekistonni tobora o‘ziga xos madaniy brendga, cheksiz ijod va ilhom maskaniga aylantirib bormoqda.
Buxoro davlat universiteti jamoasi uchun ushbu biennaleda faol ishtirok etish, talabalarimiz va yosh olimlarimizni jahon san’ati yutuqlari bilan yaqindan tanishtirish — sharafli vazifadir. Ishonchim komilki, ushbu nufuzli forum nafaqat shahrimiz, balki butun mamlakatimizning xalqaro miqyosdagi obro‘sini yanada oshiradi, yoshlarimizni esa milliy merosga hurmat va global tafakkur uyg‘unligida tarbiyalashga xizmat qiladi.
