2025-yil 8-avgust kuni O’zbekiston Respublikasi Prezidenti Shavkat Miromonovich Mirziyoyev raisligida oliy ta’lim muassasalari bitiruvchilarini ishga joylashtirish, yoshlar bandligini ta’minlash va kadrlar tayyorlash tizimini tubdan takomillashtirish masalalariga bag‘ishlangan kengaytirilgan yig‘ilish bo‘lib o‘tdi.
Yig‘ilishda so‘nggi yillarda oliy ta’lim qamrovi sezilarli darajada oshgan bo‘lsa-da, ayrim sohalarda mutaxassislar yetishmovchiligi mavjudligi qayd etildi. Xususan, avtomobilsozlik, gaz-kimyo, energetika, kimyo, farmatsevtika, muhandislik va boshqa strategik tarmoqlar uchun minglab oliy malakali kadrlar talab etilmoqda.
Davlatimiz rahbari ta’limni real iqtisodiyot ehtiyojlariga moslashtirish, “tarmoq–korxona–oliygoh” zanjirini jadallashtirish, ishlab chiqarish korxonalarida kafedra filiallari ochish kabi samarali tajribalarni kengaytirish zarurligini ta’kidladi. Yig‘ilishda Buxoro texnika universiteti misolida neft-gaz va boshqa tarmoqlarda o‘quv-ishlab chiqarish integratsiyasi muvaffaqiyatli yo‘lga qo‘yilgani alohida qayd etildi.
Shuningdek, oliygohlar faoliyatini baholashning yangi tizimi joriy etilishi belgilandi. Endilikda bitiruvchilar bandligi — 40 ball, tarmoq buyurtmalari asosidagi ilmiy faoliyat — 30 ball, xalqaro maqolalar va ilmiy salohiyat — 20 ball, grantlar jalbi — 10 ball bo‘yicha reyting tuziladi va moliyalashtirish shu asosda amalga oshiriladi. Bu tizim universitetlarni natija uchun ishlashga undaydi va rektorlar mas’uliyatini oshiradi.
Prezidentimiz tomonidan 92 ming bitiruvchini ish bilan ta’minlash bo‘yicha aniq yo‘nalishlar belgilandi. Jumladan, magistratura va ikkinchi mutaxassislikka qabul, staj talab qilmaydigan ish o‘rinlari, biznes-inkubatorlar, imtiyozli kreditlar hamda tarmoqlar bo‘yicha minglab yangi ish o‘rinlari yaratish masalalari ko‘rsatib o‘tildi.
Buxoro davlat universiteti jamoasi ushbu islohotlarni to‘liq qo‘llab-quvvatlaydi hamda ularni amaliyotga joriy etishda faol ishtirok etishga tayyor. Biz allaqachon ta’lim va ishlab chiqarish integratsiyasi bo‘yicha bir qator tashabbuslarni yo‘lga qo‘yganmiz. Jumladan, so‘nggi yillarda mahalliy korxonalar bilan hamkorlikda klaster usulida tashkil etilgan o‘quv-ishlab chiqarish loyihalari natijasida yuzlab bitiruvchilarimiz o‘z mutaxassisligi bo‘yicha ishga joylashdi.
Prezidentimiz tomonidan belgilangan vazifalar — ta’lim yo‘nalishlarini investitsiya loyihalari ehtiyojiga moslashtirish, bitiruvchilarni kafolatli ish bilan ta’minlash, universitetlarni natijadorlikka asoslangan reyting tizimi orqali baholash — oliy ta’lim sifatini oshirish va yoshlar bandligini ta’minlashga xizmat qiladi.
Davlatimiz rahbari ta’kidlaganidek, oliy ta’lim tizimining vazifasi faqat bilim berish emas, balki yoshlarni mustaqil hayotga, mehnat bozoriga va zamonaviy kasbiy talablar sharoitiga tayyorlashdir. Buxoro davlat universiteti jamoasi ushbu yondashuvni o‘zining strategik maqsadi sifatida qabul qiladi. Biz yoshlarimizning nafaqat bugungi, balki kelajakdagi bandligi va muvaffaqiyati uchun mas’ul ekanligimizni chuqur his qilamiz.
Obidjon Xamidov
Buxoro davlat universiteti rektori, iqtisodiyot fanlari doktori, professor
