Buxoro davlat universitetiga AQShning nufuzli oliygohlaridan biri – Nebraska Omaha universiteti delegatsiyasi tashrif buyurdi. Tashrif doirasida ikki tomonlama taqdimotlar hamda universitet rahbariyati va mehmonlar ishtirokida davra suhbati tashkil etildi. Suhbat davomida mehmonlar o‘zlarining safar davomida orttirgan tajribalari bilan o‘rtoqlashdilar. Uchrashuv yakunida Buxoro davlat universiteti hamda Nebraska Omaha universiteti o‘rtasida anglashuv memorandumi imzolandi. Mazkur memorandum ikki oliy ta’lim muassasasi o‘rtasida ta’lim, ilmiy tadqiqot va akademik almashinuv sohalarida o‘zaro hamkorlikni rivojlantirishga xizmat qiladi.
Shuningdek, Nebraska Omaha universiteti vakillari esdalik sifatida sertifikatlar bilan taqdirlandi. Tashrif doirasida "Dolzarb 90 kunlik" loyihasi asosida Buxoro davlat universiteti Ingliz tilshunosligi kafedrasi tomonidan "Sharq va G‘arb dialogi: O‘zbekistonda ko‘ptilli, inklyuziv va turfa madaniyatli ta’lim" mavzusida yozgi maktab ham tashkil etildi. "Educational Dialogue of East and West: Multilingual Culture, Diversity, and Inclusion in Uzbekistan" nomli yozgi maktabda Nebraska Omaha universitetining pedagogika, salomatlik va gumanitar fanlar fakulteti professorlari Dr. Madina Djuraeva, Dr. Justin Anderson hamda ushbu universitetning magistrantlari faol ishtirok etdi.
Yozgi maktab davomida BuxDU professorlari va amerikalik olimlar mavzuga oid taqdimotlar o‘tkazib, o‘zaro tajriba almashdilar. Ushbu hamkorlik ilmiy va madaniy aloqalarni mustahkamlash bilan birga, xalqaro ta’lim tizimidagi integratsiyani chuqurlashtirishga xizmat qiladi.
