Qadimiy va hamisha navqiron Buxoro yana bir bor o’zining betakror jozibasi, mehmondo’stligi va boy madaniy merosi bilan dunyo nigohini o’ziga qaratmoqda. Shahrimiz ko’chalarida kezayotgan bayramona ruh, xalqimizning yuz-ko’zidagi shodlik va faxr tuyg’ulari XXI “Ipak va ziravorlar” xalqaro festivalining naqadar katta ahamiyatga ega ekanligidan dalolat beradi.
Ushbu nufuzli festival Turizm va madaniy meros vazirligi hamda Buxoro viloyati hokimligi kabi mas’ul idoralar tomonidan yuqori saviyada tashkil etilayotgani uning davlatimiz madaniy siyosatidagi muhim o‘rnidan dalolat beradi. Festival nafaqat Buyuk Ipak yo‘li an’analarini tiklash, Buxoroning bebaho madaniy merosini, xalq amaliy san’ati va hunarmandchiligining noyob namunalarini dunyoga namoyish etish, balki mintaqamizning turizm salohiyatini yanada yuksaltirishga xizmat qilishi shubhasiz.
Xorijiy davlatlardan ko‘plab hunarmandlar, san’atkorlar va sayyohlarning tashrifi festivalning xalqaro miqyosdagi nufuzi ortib borayotganidan dalolatdir. Bu, o‘z navbatida, madaniyatlararo muloqotni mustahkamlash, xalqaro hamkorlik aloqalarini kengaytirish va O‘zbekistonning ijobiy imijini xalqaro maydonda mustahkamlash uchun muhim zamin yaratadi.
“Ipak va ziravorlar” festivali davomida juda ko‘plab mamlakatlar tomonidan qiziqish yildan-yilga ortib borayotganini guvohi bo‘ldik. Bu yil festival yanada o‘zgacha ko‘tarinki ruhda, yangi chiqishlar, yangi repertuar asosida o‘tdi. Bu albatta bugungi kunda yangilanayotgan O‘zbekiston fenomenini eng asosiy yo‘nalishlaridan biri hisoblanadi.
Alohida mamnuniyat bilan ta’kidlash joizki, Buxoro davlat universiteti jamoasi — bizning jonkuyar professor-o‘qituvchilarimiz, ilmga chanqoq talabalarimiz va ayniqsa, tashabbuskor volontyor talabalarimiz ushbu festivalning yuqori saviyada o‘tishiga o‘zlarining munosib hissalarini qo‘shdilar. Men rektor sifatida universitetimiz ahil jamoasining festivalning ochilish marosimidagi, shahrimiz ko‘chalari bo‘ylab o‘tkazilgan tantanali yurish paradidagi faol va ko‘tarinki ruhdagi ishtirokini ko‘rib faxrlandim. Bizning volontyor talabalarimiz festival davomida turli tashkiliy ishlarda, mehmonlarni kutib olish va ularga yo‘l-yo‘riq ko‘rsatishda o‘zlarining yuksak fuqarolik pozitsiyalari va tashabbuskorliklarini namoyon etdilar. Bu jarayonlar nafaqat yoshlarimizning tashkilotchilik qobiliyatlarini oshiradi, balki ularning ma’naviy-ma’rifiy dunyoqarashini boyitadi, milliy qadriyatlarimizga bo‘lgan hurmatini mustahkamlaydi va talabalarimiz uchun bebaho amaliy tajriba maktabi bo‘lib xizmat qiladi.
Buxoro davlat universiteti ushbu an’anaviy festivalni har tomonlama qo‘llab-quvvatlaydi va kelgusida uning ilmiy-ma’rifiy yo‘nalishlarini yanada kuchaytirish, yosh tadqiqotchilarni jalb qilish bo‘yicha hamkorlik qilishga doimo tayyor.
Fursatdan foydalanib, festivalning barcha tashkilotchilariga, hunarmandlarga, san’atkorlarga va mehmonlarga o‘z minnatdorchiligimni izhor etaman. Ushbu an’ana bardavom bo‘lib, Buxoroning dovrug‘ini yanada keng yoyishiga ishonaman.
Obidjon Xamidov,
Buxoro davlat universiteti rektori, iqtisodiyot fanlari doktori, professor
