O‘zbekiston Respublikasi Fanlar akademiyasi akademigi, fizika-matematika fanlari doktori, professor Muqimov Komil Muqimovich hamda Buxoro davlat universiteti rektori Obidjon Xamidov o'rtasida uchrashuv bo'lib o'tdi.
O‘zbekiston Respublikasi Fanlar akademiyasi akademigi, fizika-matematika fanlari doktori, professor Muqimov Komil Muqimovich Buxoro davlat universitetiga tashrifi davomida universitet rektori bilan uchrashdi. Uchrashuvda Geliofizika, qayta tiklanuvchi energiya manbalari va elektronika kafedrasi professori S.Q.Qahhorov ishtirok etdi. Suhbat chog‘ida tomonlar ilm-fan sohasidagi hamkorlik aloqalarini mustahkamlash, fundamental va amaliy tadqiqotlar yo‘nalishida qo‘shma loyihalarni yo‘lga qo‘yish masalalarini muhokama qilishdi.
Uchrashuvda universitetda amalga oshirilgan ilmiy tadqiqotlar, professor-o‘qituvchilarning xalqaro jurnallardagi nashrlari, yosh olimlar ishtirokida olib borilayotgan innovatsion ishlanmalar va ilmiy laboratoriyalar faoliyati alohida ta’kidlandi. Shuningdek, fizika va matematika yo‘nalishlarida erishilgan yutuqlar, xususan, zamonaviy texnologiyalarni joriy etish, xalqaro hamkorlik doirasida o‘tkazilgan konferensiyalar va grant loyihalari natijalari e’tirof etildi. Kelgusida esa ilmiy salohiyatni oshirish, doktorantura tizimini rivojlantirish, akademik almashinuv dasturlarini kengaytirish va qo‘shma ilmiy markazlar tashkil etish bo‘yicha aniq rejalar belgilandi. Mazkur uchrashuv universitet ilmiy hayotida yangi bosqichni boshlab berishi kutilmoqda.
Muqimov Komil Muqimovich ishtirokida "Uch avlod uchrashuvi" bo‘lib o‘tdi. BuxDU faollar yig'ingohida tashkil etilgan tadbir ilm-fan, ta’lim va ma’naviyat sohasidagi uch avlod vakillarini birlashtirdi.
Tadbirni Buxoro davlat universiteti rektori, iqtisodiyot fanlari doktori, professor Obidjon Xafizovich Xamidov kirish so‘zi bilan ochib berdi. U o‘z nutqida akademik Muqimov Komil Muqimovichning ilm-fan rivojiga qo‘shgan ulkan hissasini e’tirof etdi va yosh avlod uchun bunday uchrashuvlarning katta tarbiyaviy va ilmiy ahamiyatga ega ekanligini ta’kidladi.
Uchrashuv davomida akademik Muqimov Komil Muqimovich universitet jamoasi bilan ochiq va samimiy suhbat olib bordi. U o‘zining ilmiy faoliyati, O‘zbekiston fanlar akademiyasidagi ishlari, yosh olimlarga bo‘lgan e’tibori hamda istiqboldagi rejalar haqida fikr bildirdi. Shuningdek, u yoshlarni zamonaviy ilmiy izlanishlarga jalb qilish, ularning tashabbuslarini qo‘llab-quvvatlash muhimligini qayd etdi.
Tadbir davomida professorning hayot va ijod yo‘liga bag‘ishlangan videorolik namoyish etildi. Shundan so‘ng, BuxDU Geliofizika, qayta tiklanuvchi energiya manbalari va elektronika kafedrasi professori, Nuroniylar kengashi raisi, pedagogika fanlari doktori, professor Qahhorov Siddiq Qahhorovich akademikning shogirdi sifatida u haqidagi iliq xotiralarini va yuksak bahosini o‘rtoqlashdi.
Ishtirokchilar o‘rtasida savol-javob shaklidagi muloqot tashkil etildi, unda professor Muqimov yoshlar va professor-o‘qituvchilarning qiziqtirgan savollariga atroflicha javob berdi. Tadbir yakunida BuxDU rektori Obidjon Xamidov yana bir bor akademik Muqimovga samimiy minnatdorlik bildirib, universitet va Fanlar akademiyasi o‘rtasidagi hamkorlik aloqalarini yanada mustahkamlashga tayyorligini bildirdi.
Bu uchrashuv Buxoro davlat universitetining ilmiy va ma’naviy hayotida muhim voqea bo‘ldi hamda uch avlod vakillari o‘rtasidagi uzviy aloqalarni yanada mustahkamladi.
