Mazkur uchrashuv O‘zbekiston Respublikasi Vazirlar Mahkamasining tegishli qarorlari hamda Buxoro davlat universitetida raqamli xavfsizlikni ta’minlash, ta’lim jarayonida zamonaviy axborot texnologiyalaridan samarali va xavfsiz foydalanish maqsadida tashkil etildi. Tadbirda O‘quv-uslubiy departamenti xodimlari, professor-o‘qituvchilar hamda mas’ul mutaxassislar ishtirok etdilar.
Uchrashuv davomida kibermadaniyat tushunchasi, uning bugungi raqamli jamiyatdagi o‘rni va ahamiyati, kibergigiyena qoidalariga rioya etishning dolzarbligi atroflicha yoritildi. Shuningdek, shaxsiy ma’lumotlarni himoyalash, fishing va zararli havolalardan ehtiyot bo‘lish, kuchli parollardan foydalanish, ijtimoiy tarmoqlarda mas’uliyatli xatti-harakatlarni shakllantirish, xizmat kompyuterlarida axborot xavfsizligini ta’minlash masalalariga alohida e’tibor qaratildi.
Tadbir jarayonida ishtirokchilar tomonidan qiziqtirgan savollar berildi, real hayotiy misollar asosida muammoli holatlar muhokama qilindi hamda kibertahdidlarning oldini olish bo‘yicha amaliy tavsiyalar berildi. Uchrashuv yakunida ta’lim muassasalarida kibermadaniyatni yuksaltirish va kibergigiyenani rivojlantirish bo‘yicha targ‘ibot-tashviqot ishlarini tizimli ravishda davom ettirish zarurligi ta’kidlandi.
