Buxoro davlat universitetida raqamli muhitda xavfsiz va samarali faoliyat yuritishni ta’minlash, shuningdek, xodimlarning axborot texnologiyalaridan foydalanish bo‘yicha bilim va ko‘nikmalarini yanada mustahkamlash maqsadida muhim tadbirlar tashkil etildi. Jumladan, Raqamli ta’lim texnologiyalari departamenti xodimlari tomonidan kibermadaniyatni yuksaltirish hamda kompyuter savodxonligini oshirishga qaratilgan uchrashuvlar Sirtqi (maxsus sirtqi) va masofaviy ta’lim bo‘limida o‘tkazildi.
Mazkur uchrashuvlar davomida zamonaviy axborot-kommunikatsiya texnologiyalaridan to‘g‘ri foydalanish, kiberxavfsizlik qoidalariga rioya etish, shaxsiy va xizmat ma’lumotlarini himoyalash, zararli dasturlar hamda internet orqali uchraydigan firibgarlik holatlaridan ogoh bo‘lish masalalariga alohida e’tibor qaratildi.
Shuningdek, kompyuter va internetdan samarali foydalanish, elektron hujjatlar bilan ishlash, masofaviy ta’lim platformalari va raqamli xizmatlardan to‘g‘ri foydalanish bo‘yicha amaliy tavsiyalar berildi. Ishtirokchilar o‘zlarini qiziqtirgan savollarga mutaxassislar tomonidan batafsil javoblar oldilar hamda o‘zaro fikr almashdilar.
Mazkur tadbirlar xodimlar va ta’lim jarayonida ishtirok etuvchilarning raqamli savodxonligini oshirish, axborot xavfsizligi madaniyatini shakllantirish hamda masofaviy ta’lim jarayonlarining samaradorligini yanada oshirishga xizmat qilmoqda.
