Buxoro viloyati IIB Axborot texnologiyalari sohasidagi jinoyatlarga qarshi kurashish boshqarmasi mutaxassislari tomonidan Buxoro Davlat universitetida talabalar uchun raqamli xavfsizlik madaniyatini oshirishga qaratilgan navbatdagi profilaktik tadbir tashkil etildi.
Uchrashuv davomida talabalar onlayn makonda uchrayotgan xavf-xatarlarni aniqlash, shaxsiy ma’lumotlarni himoya qilish va internetdan mas’uliyatli foydalanish bo‘yicha amaliy tavsiyalar bilan tanishtirildi. Ishtirokchilarga ijtimoiy tarmoqlarda uchrab turadigan firibgarliklarning yangi ko‘rinishlari, yolg‘on reklama va tanlovlar, zararli havolalar orqali foydalanuvchi ma’lumotlarini qo‘lga kiritish usullari haqida batafsil tushuntirildi.
Mutaxassislar shuningdek, mobil qurilmalarda xavfsizlik sozlamalarini to‘g‘ri yo‘lga qo‘yish, kuchli parollar yaratish, noma’lum dasturlarni o‘rnatish oqibatlari va kundalik axborot xavfsizligi qoidalariga rioya qilishning ahamiyati borasida amaliy ko‘rsatmalar berdilar.
Tadbir so‘ngida talabalar o‘z savollariga javob oldilar va kiberxavflarni oldindan tanish, ularga nisbatan ogohlikni kuchaytirish bo‘yicha foydali tavsiyalar bilan "qurollantirildi.
