2025-yil 20-noyabr kuni Buxoro davlat universiteti Tabiiy fanlar va agrobiotexnologiya fakultetida professor-o‘qituvchilar, ishchi-xodimlar hamda talaba-yoshlar ishtirokida raqamli savodxonlik va kiberxavfsizlik madaniyatini yuksaltirishga qaratilgan targ‘ibot tadbiri tashkil etildi. Tadbirda Raqamli ta’lim texnologiyalari departamenti xodimlari qatnashdi.
Tadbir davomida departament boshlig‘i M.Z. Xusenov universitetda raqamli ta’lim texnologiyalarini joriy etish jarayonlari, amalga oshirilayotgan ishlar, yangi platformalar va sohadagi dolzarb yangiliklar haqida batafsil ma’lumot berdi. Shuningdek, u raqamli tizimlarning qo‘llanilishiga doir normativ-me’yoriy hujjatlar, jumladan 2022-yil 17-iyuldan kuchga kirgan “Kiberxavfsizlik to‘g‘risida”gi qonunning mazmun-mohiyati va uning axborot xavfsizligidagi o‘rni haqida tushuntirishlar berdi.
RTT departamentining AXT bo‘yicha mas’ul xodimi R.N. Salimov axborot xavfsizligi, kiber tahdidlar, inson omilining ahamiyati, bank kartalarini himoyalash, internet va ijtimoiy tarmoqlardan xavfsiz foydalanish qoidalari haqida batafsil ma’ruza qildi. Shuningdek, “1xBet”, “Mostbet”, “Linebet” kabi tavakkalchilikka asoslangan o‘yinlarning inson ongiga salbiy ta’siri yuzasidan ogohlantirishlar berildi.
Tadbir davomida kiberjinoyatlarning keng tarqalgan shakllari, ularning oqibatlari, shubhali havola va fayllardan himoyalanish, kompyuter o‘yinlariga ortiqcha berilishning o‘quv jarayoniga ta’siri kabi masalalar bo‘yicha videoroliklar namoyish etildi va ochiq muloqot tashkil qilindi.
Mazkur targ‘ibot ishlari orqali talaba-yoshlar va xodimlarning raqamli savodxonligini oshirish, ularni axborot makonida mas’uliyatli bo‘lishga undash, shuningdek kiberxavfsizlik madaniyatini shakllantirish maqsad qilingan.
