Respublika miqyosida har yil noyabr oyida e’lon qilingan “Kibermadaniyatni yuksaltirish oyligi” munosabati bilan Buxoro davlat universitetida talaba-yoshlar o‘rtasida axborot madaniyatini oshirishga qaratilgan tadbir tashkil etildi. Tadbirning asosiy maqsadi yoshlarni raqamli makonda xavfsiz faoliyat yuritish, shaxsiy ma’lumotlarni himoya qilish va internetdan mas’uliyat bilan foydalanish borasida xabardor qilishdir.
Tadbir davomida ishtirokchilarga fishing, zararli dasturlar, kiberhujumlar va boshqa zamonaviy kibertahdidlardan himoyalanish yo‘llari haqida batafsil tushuntirishlar berildi. Shuningdek, shaxsiy ma’lumotlarni qanday xavfsiz saqlash, kuchli parollarni yaratish va ularni oqilona boshqarish bo‘yicha amaliy maslahatlar taqdim etildi.
Maxsus sessiyada Buxoro davlat universitetining ishchi-xodimlari, professor-o‘qituvchilari va talabalariga parol siyosatidan oqilona foydalanish bo‘yicha yo‘riqnoma tanishtirildi, bu esa har bir foydalanuvchining onlayn xavfsizligini oshirishga qaratilgan. Tadbir ishtirokchilari interaktiv mashg‘ulotlar orqali raqamli xavfsizlikning kundalik hayotdagi ahamiyatini amalda o‘rgandilar.
Ushbu tadbir natijasida talaba-yoshlar o‘rtasida axborot madaniyati va kiberxavfsizlik sohasidagi bilim darajasi sezilarli darajada oshdi, ularning raqamli makonda mas’uliyat bilan harakat qilish ko‘nikmalari mustahkamlandi.
