Tadbirni O‘quv jarayonini muvofiqlashtirish sektori bosh mutaxassisi R.S.Qodirova kirish so‘zi bilan ochib, bugungi kunda jamiyatimizda axborot texnologiyalari mislsiz sur’atlarda rivojlanayotgani, shu bilan birga axborot xavfsizligi va kiberxavfsizlik bilan bog‘liq muammolar ham dolzarblashib borayotganini ta’kidladi. U mazkur yo‘nalishlar nafaqat mahalliy, balki global miqyosda ham jiddiy e’tibor va samarali yechim talab qiladigan masalalar sirasiga kirishini qayd etdi.
Shundan so‘ng, Buxoro davlat universiteti Raqamli ta’lim texnologiyalari departamenti boshlig‘i M.Z.Xusenov so‘zga chiqib, Universitetda raqamli ta’lim texnologiyalarini joriy etish jarayonlari, ushbu yo‘nalishda amalga oshirilayotgan ishlar va sohadagi yangiliklar haqida batafsil ma’lumot berdi. Shuningdek, u professor-o‘qituvchilar, xodimlar va talabalarga yaratilayotgan zamonaviy imkoniyatlar, raqamli tizimlarni joriy etish bilan bog‘liq normativ-me’yoriy hujjatlar mazmuni haqida ham to‘xtalib o‘tdi. U 2022-yil 15-aprelda qabul qilinib, 2022-yil 17-iyuldan kuchga kirgan “Kiberxavfsizlik to‘g‘risida”gi qonunning mazmun-mohiyati, uning jamiyatdagi axborot xavfsizligini ta’minlashdagi o‘rni va ahamiyati yuzasidan ham atroflicha tushuntirish berdi.
RTT departamenti AXT bo‘yicha mas’ul xodimi R.N.Salimov o‘z taqdimotida axborot xavfsizligi, xavfsizlikka tahdidlar, axborot himoyasi, tahdidlar turlari va ularda inson omili, universitetda axborot xavfsizligini ta’minlash bo‘yicha amalga oshirilayotgan chora-tadbirlar xususida batafsil to‘xtalib o‘tib, internet va ijtimoiy tarmoqlardan xavfsiz foydalanish, bank kartalaridagi mablag‘larni himoyalashning oddiy usullari, shuningdek “1xBet”, “Mostbet”, “Linebet” kabi tavakkalchilikka asoslangan o‘yinlarning inson ongiga salbiy ta’siri haqida ham batafsil tushuntirishlar berib o‘tdi.
Kiberxavfsizlik madaniyatini yuksaltirish jarayonida har bir fuqaro shaxsiy mas’uliyatni chuqur anglab, unga amal qilishi lozimligi alohida qayd etildi. Axborot texnologiyalaridan foydalanishda doimiy hushyorlik va ogohlikka rioya etish, har qanday shubhali havola yoki faylni ochishdan avval uning manbasi va ishonchliligini sinchiklab tekshirish zarurligi tushuntirildi.
Mazkur tadbirlar orqali yoshlarimizning raqamli savodxonligini oshirish, ularni kiberxavfsizlik madaniyatiga yo‘naltirish va axborot makonida mas’uliyatli bo‘lishini ta’minlashni maqsad qilingan.
Raqamli texnologiyalar vositasida sodir etiladigan huquqbuzaliklarning eng ko‘p uchrayotgan turlari va shakllarini aniqlash, kibermakondagi tahdidlarning omillari va salbiy oqibatlarini yoritish, uyali telefon hamda internet tarmog‘idan xavfsiz foydalanish qoidalariga rioya etish, kompyuter o‘yinlariga ortiqcha berilishning o‘quv jarayoniga ta’sirini tushuntirish, muqaddam kiberjinoyatlar sodir etib jazo o‘tagan shaxslarning ogohlantiruvchi chiqishlari, kibertahdidlardan himoyalanish choralari hamda axborot texnologiyalari sohasida savodxonlikni oshirishga qaratilgan bilim va ko‘nikmalarni shakllantiruvchi videoroliklar namoyishi o‘tkazildi.
Tadbir qizg‘in bahs va munozaralarga boy bo‘ldi. Tadbir ishtirokchilarining mavzu yuzasidan taklif va mulohazalar tinglanib inobatga olindi, ularni qiziqtirgan savollarga RTT departamenti boshlig‘i M.Z.Xusenov, departament xodimi R.N.Salimov tomonidan atroflicha javob berdilar.
