Buxoro davlat universiteti Xorijiy tillar fakulteti tyutorlari M.S. Nazarova, F.A. Davronova va L.T. Rahmonovaga biriktirilgan guruh talabalari ishtirokida hamda fakultetning profilaktika inspektori, katta leytenant Sh. Raxmatova bilan hamkorlikda “Kiberjinoyatchilik qurboni bo‘lmaylik!” mavzusida profilaktik suhbat tashkil etildi.
Tadbirning asosiy maqsadi – talabalar o‘rtasida kiberjinoyatchilikning oldini olish, raqamli makonda ehtiyotkorlik bilan harakat qilish madaniyatini shakllantirish hamda firibgarlik, soxta sahifalar, zararli dasturlar va shaxsiy ma’lumotlarni o‘g‘irlash kabi holatlardan ogohlantirishdan iborat bo‘ldi.
Profilaktika inspektori Sh. Raxmatova o‘z chiqishida kiberjinoyatlarning eng ko‘p uchraydigan turlari, ularning huquqiy oqibatlari va shaxsiy ma’lumotlarni himoya qilishning amaliy usullari haqida batafsil ma’lumot berdi. Shuningdek, u ijtimoiy tarmoqlarda noma’lum havolalarga bosmaslik, begona manbalardan “.apk” formatidagi ilovalarni yuklab olmaslik hamda onlayn to‘lov tizimlaridan xavfsiz foydalanish bo‘yicha foydali tavsiyalar bilan o‘rtoqlashdi.
Tyutorlar tomonidan esa talabalar o‘rtasida kiberxavfsizlik madaniyatini mustahkamlash, raqamli savodxonlikni oshirish va internetda mas’uliyatli faoliyat yuritish zarurligi ta’kidlab o‘tildi.
Tadbir yakunida talabalar kiberjinoyatlardan himoyalanish bo‘yicha savollariga javob oldilar hamda profilaktika yo‘nalishida targ‘ibot materiallari bilan tanishdilar. Mazkur uchrashuv yoshlar ongida kiberxavfsizlikning ahamiyatini chuqur anglash va amaliy himoya ko‘nikmalarini shakllantirishga xizmat qildi.
