Buxoro davlat universiteti Axborot tizimlari va raqamli texnologiyalar kafedrasi dotsenti, pedagogika fanlari nomzodi Zaripova Gulbaxor Kamilovna hamda tyutor Nazarova Xurshida Yarashevna tomonidan Buxoro davlat universiteti Raqamli ta’lim texnologiyalari departamenti bilan hamkorlikda “Kiberxavfsizlik va uning turlari” mavzusida davra suhbati tashkil etildi.
Mazkur tadbirda 12-1ASAT-25, 12-1ASMT-25 hamda 12-1MAD-24 guruh talabalari faol ishtirok etdilar. Davra suhbati davomida ishtirokchilar kiberxavfsizlik tushunchasi, uning turlari, raqamli makonda uchraydigan xavf-xatarlar, shuningdek, ularning oldini olish yo‘llari haqida batafsil ma’lumotlarga ega bo‘ldilar.
Tadbir jarayonida mutaxassislar bugungi kunda internet tarmoqlarida uchrayotgan firibgarlik holatlari, virusli dasturlar, soxta mobil ilovalar (.apk) hamda shaxsiy ma’lumotlarni himoya qilish masalalariga alohida e’tibor qaratdilar. Shuningdek, ijtimoiy tarmoqlarda noma’lum havolalarga bosmaslik, shaxsiy ma’lumotlarni begonalarga yubormaslik, elektron to‘lov tizimlaridan xavfsiz foydalanish va kiberjinoyatlardan himoyalanish bo‘yicha amaliy tavsiyalar berildi.
Davra suhbati davomida talabalar o‘zlarini qiziqtirgan savollar bilan murojaat qilib, kiberxavfsizlik sohasiga oid yangiliklar, zamonaviy himoya tizimlari va sun’iy intellekt yordamida tahdidlarni aniqlash mexanizmlari haqida fikr almashdilar.
Tadbirning asosiy maqsadi — yoshlarning raqamli savodxonligini oshirish, kiberxavfsizlik madaniyatini shakllantirish, hamda ularni axborot makonida mas’uliyatli va ehtiyotkorlik bilan harakat qilishga o‘rgatishdan iborat bo‘ldi.
Mazkur uchrashuv orqali talabalarda kiberxavfsizlikning dolzarbligi va uning kundalik hayotdagi ahamiyati haqidagi tushunchalar yanada mustahkamlandi. Tadbir yakunida ishtirokchilar kiberxavfsizlikka oid foydali manbalar va amaliy qo‘llanmalar bilan tanishtirildi.
