Buxoro davlat universitetida “Kiber madaniyatni rivojlantirish oyligi” doirasida “Kiberjinoyatdan ogoh bo‘ling” mavzusida navbatdagi profilaktik tadbir o‘tkazildi.
Mazkur tadbir Fizika-matematika va axborot texnologiyalari fakultetining 1-1PMK-24 guruhi talabalari ishtirokida tashkil etildi. Tadbirda yoshlar o‘rtasida internet tarmoqlaridan to‘g‘ri foydalanish, shaxsiy ma’lumotlarni himoya qilish, onlayn firibgarliklardan ogoh bo‘lish hamda kibergigiyena qoidalariga rioya etish masalalariga alohida e’tibor qaratildi.
Tadbir davomida mutaxassis tomonidan kiberjinoyatlarning keng tarqalgan turlari, ularning oldini olish usullari, shuningdek, raqamli dunyoda ehtiyotkorlik bilan harakat qilishning ahamiyati haqida tushuntirishlar berildi.
Talabalarga noma’lum havolalarni ochmaslik, begona fayllarni yuklab olmaslik, shaxsiy ma’lumotlarni uchinchi shaxslarga bermaslik kabi muhim tavsiyalar berildi.
Tadbirning asosiy maqsadi — yoshlarni kiberxavf-xatarlardan ogoh etish, raqamli madaniyatni yuksaltirish hamda kiberjinoyatlarga qarshi ogohlikni oshirishdan iborat bo‘ldi.
