13-noyabr profilaktika kuni munosabati bilan Filologiya fakulteti 6-5Uzb25 guruhida tahsil olayotgan qoraqalpoqlik talabalar ishtirokida “Kiberjinoyatdan ogoh bo‘ling” mavzusida profilaktik tadbir o‘tkazildi.
Mazkur tadbirda fakultet xotin-qizlar ishlari bo‘yicha dekan maslahatchisi U.To‘rayeva, profilaktika inspektori, leytenant A.G‘ulyamov, tyutor N.Safarova hamda Raqamli ta’lim texnologiyalari departamenti xodimlari ishtirok etishdi.
Tadbir davomida ishtirokchilarga bugungi kunda keng tarqalayotgan internet firibgarliklari, soxta sahifalar orqali aldash holatlari, noma’lum “.apk” fayllar orqali zararli dasturlar tarqatilishi haqida batafsil ma’lumot berildi. Mutaxassislar yoshlarni kiberjinoyatlar, ijtimoiy tarmoqlarda shaxsiy ma’lumotlarni oshkor etish xavflari hamda kibergigiyena qoidalariga amal qilish zarurati bo‘yicha ogohlantirdilar.
Shuningdek, talabalar bilan ochiq muloqot tashkil etilib, ularning kiberxavfsizlikka oid savollariga javob berildi. Tadbir ishtirokchilari o‘z fikrlarida internetdan xavfsiz foydalanish har bir foydalanuvchining mas’uliyati ekanligini ta’kidlab o‘tdilar.
Mazkur profilaktik uchrashuvning asosiy maqsadi — yoshlar o‘rtasida kiberjinoyatlarga qarshi ogohlikni oshirish, raqamli madaniyatni rivojlantirish va internet tarmoqlarida xavfsiz harakat qilish ko‘nikmalarini mustahkamlashdan iboratdir.
