2025-yil 12-noyabr kuni Buxoro davlat universitetining Fizika-matematika fakulteti hamda universitet huzuridagi “Universal sport majmuasi”da “Kibermadaniyatni yuksaltirish oyligi” doirasida navbatdagi targ‘ibot-tashviqot tadbirlari bo‘lib o‘tdi.
Mazkur tadbirlar Buxoro davlat universiteti Raqamli ta’lim texnologiyalari departamenti hamda fakultet tyutorlari hamkorligida tashkil etildi. Tadbirlarning asosiy maqsadi — talaba va xodimlar o‘rtasida raqamli madaniyatni oshirish, kibergigiyena qoidalariga rioya etish, internet tarmoqlaridan xavfsiz foydalanish madaniyatini keng targ‘ib qilishdan iborat bo‘ldi.
Tadbir davomida ishtirokchilarga internetda shaxsiy ma’lumotlarni himoya qilish, firibgarlik holatlarining oldini olish, zararli dasturlar (virusli fayllar, noma’lum APK ilovalar)dan ehtiyot bo‘lish, ijtimoiy tarmoqlarda shaxsiy xavfsizlikni ta’minlash kabi muhim mavzularda batafsil tushunchalar berildi.
Shuningdek, Raqamli ta’lim texnologiyalari departamenti mutaxassislari tomonidan tayyorlangan videoroliklar namoyish etilib, real hayotdagi kiberjinoyat holatlari misolida talabalarga ogohlik va ehtiyotkorlik zarurligi uqtirildi.
Tadbir yakunida talabalarga “Internetdan xavfsiz foydalanaman” shiori ostida eslatmalar va tavsiyalar tarqatildi. Ishtirokchilar o‘z fikr va takliflari bilan faol qatnashib, kibermadaniyatni yuksaltirishda har bir fuqaroning mas’uliyati muhimligi ta’kidlab o‘tildi.
