Shunday odamlar borki, boshqalar ularga havas bilan qaraydi, ular bilan to‘rt og‘iz shirin so‘z aytib, muloqotda bo‘lishni istaydi. Istarasi issiq, bosh¬qalar diqqatini o‘ziga tortadigan, yurish-turishi, harakatlari, gaplashish jozibasi, orasta ki-yinishi o‘ziga xos, buning ustiga, soddadil va kamtarin. Bunday xislatlarga ega bo‘¬lish bir jihatdan ilmga intilishga bog‘liq bo‘lsa, ajab emas. Ba‘zan shunday odamlarni ko‘rib Yusuf Xos Hojibning "O‘quv qut beradi, bilim sharaf-shon, asli shu tufayli ulug‘dir inson", degan satrlari yodimga tushadi. Shunday ulug‘ odamlarga sajda qilging keladi. Do‘stim, birodarim Sharif Olimovich Boltayev ana shunday odamlar toifasidan.Bo‘lajak olim 1959 yilda o‘rta maktabni "a‘lo" baholarda tugatib, Buxoro davlat pedagogika institutining tarix-filologiya fakulьtetiga o‘qishga kirdi. Bu dargohda u Said Aliyev, Mustaqim Mirzayev, Nusrat Rahmonov, Narzulla Mo‘minov, Yoqub Pinxasov, Munira Qosimova, Hamro Hakimov va boshqa ko‘plab zahmatkash, halol, pok muallimlardan saboq oldi.O‘tgan asrning 50-60-yillarida aholining, ayniqsa, talabalarning dasturxoni to‘¬kin emas edi. Shuning uchun Sharifjon yozgi ta‘til davrida g‘isht quyardi, oilasiga dehqonchilikda ko‘maklashardi. 3-4 oy davom etadigan paxta yig‘im-terimi davrida ham qattiq mehnat qilib, o‘ziga kiyim-bosh va boshqa xarajatlar uchun mablag‘ jamg‘arardi. Besh yil shunday qattiq ham aqliy, ham jismoniy mehnat bilan o‘tdi. Sharifjon davlat imtihonlarini "a‘lo" bahoga topshirib, ona qishlog‘iga imtiyozli diplom bilan qaytdi.1964-1967 yillarda ustozi Ya.Axmedov rahbarlik qi¬layotgan maktabda o‘quvchilarga tarix fanidan dars berdi. 1967 yil sentyabrida uni Buxoro davlat pedagogika ¬institutiga ishga taklif qilishdi. Shundan boshlab u qariyb 50 yil davomida bu oliy ta‘lim dargohida faoliyat yuritdi.Bu dargohda Sharif Olimovich sevimli ustozi Rahim Ashurov maslahatlarini olib, K.Nosirov, X.Hasanov, R.Beshimov, S.Namozov, A.Nurov singari olim va pedagoglar bilan yelkama-elka ishladi. BuxDU ijtimoiy-ma‘rifiy hayotida mohir tashkilotchi, hamma ishga bosh-qosh bo‘ladigan, ishning ko‘zini biladigan yetuk rahbar ekanligini namoyish eta oldi. Jamoat ishlarida faollik ko‘rsatdi, fakulьtetda dekan muo¬vini va dekan, Siyo¬satshunoslik va O‘zbekiston tarixi kafedralarida mudir, universitet ilmiy kengashida ilmiy kotib, tarbiya¬viy ishlar bo‘yicha rektor muo¬vini vazifalarida ishladi.Sharif Boltayevning uzoq yillar viloyat shahar va tumanlari aholisi orasida, oliy o‘quv yurtlari jamoalarida, xalq ta‘limi muassasalarida, tashkilotlar, idoralar xodimlari o‘rtasida davlatning ichki va tashqi siyosati haqida bugungi hayot nafasi bilan hamohang ma‘ruzalar qilgani unga katta obro‘ va sharaf olib keldi. Gazeta, radio va televideniye uning minbariga aylandi.Olim tarix ilmi rivojiga ham munosib hissa qo‘shdi. 1972 yilda u tarix fanlari nomzodi ilmiy darajasini olish uchun yozgan dissertatsiya¬sini muvaffaqiyatli himoya qildi, sal vaqt o‘tmay unga dotsentlik unvoni ham berildi.Olimning keyingi yillardagi faoliyati O‘zbekiston tarixini chuqur, puxta, haqqoniy, adolat mezonlari asosida o‘rganishga safarbar etilganligi bilan ahamiyatlidir. Yuzdan ortiq maqolalar va uslubiy qo‘llanmalar muallifi Sharif Boltayevning ishlaridan biri "O‘zbek davlatchiligining Amir ¬Temur boshqargan bosqichi va uning jahon tarixida tutgan o‘rni" deb nomlangan. Bu o‘quv-uslubiy qo‘llanma Amir Temur tarixini o‘rganishning milliy mafkura asoslariga metodologik manba bo‘lib xizmat qilmoqda.Uning viloyat pedagog xodimlar malakasini oshirish va qayta tayyorlash institutidagi faoliyati ham ibratli sahifalarga to‘la. Uning mash¬g‘ulotlarida ting¬lovchilarga O‘zbekiston tarixining dolzarb muammolari keng yoritib beriladi, Vatan tuyg‘usini yosh avlod qalbi va ongiga singdirish yo‘llari va usullari tavsiya qilinadi.Shuning barobarida, Sharif Boltayev oilada farzandlariga mehribon va g‘amxo‘r ota, o‘ttizdan ortiq nevara va evaralar davrasida dilkash bobo, do‘stlariga xushchaqchaq birodar, shogirdlar maslahatgo‘yi, chehrasidan nur yog‘i¬luvchi, faqat bosh harflar bilan yoziladigan samimiy va kamtar INSON sifatida ham yosh avlodga ibratdir.Toshpo‘lat RAHMONOV, tarix fanlari nomzodi, dotsent
