Respublikamiz Prezidentining "2017-2019 yillarda Buxoro shahri va Buxoro viloyati sayyohlik salohiyatini jadal rivojlantirish chora-tadbirlari to'g'risidagi" 2980-sonli qarorida Buxoro shahri va Buxoro viloyati sayyohlik salohiyatini yanada rivojlantirish, sayyohlarning madaniy merosimizning noyob obyektlari bilan keng tanishishlari uchun maksimal qulay sharoitlarni yaratish, mintaqada zamonaviy sayyohlik infratuzilmasining jadal rivojlanishini ta'minlash, sayyohlik, mehmonxona va transport xizmatlarining zamonaviy talablarga muvofiq holda turlarini kengaytirish va sifatini yaxshilash maqsadida qatori ishlar olib borish nazarda tutilgan. Albatta, ushbu ishlarni amalga oshirishda yetakchi xorijiy tajriba, ilmiy yondashuvlar, amaliy ko'nikmalar, tahliliy ma'lumotlardan foydalanish zarur. Mazkur qarorning ijrosi bo'yicha Buxoro viloyati hokimining turizm masalalari bo'yicha o'rinbosari B.Z.Shahriyorov rahbarligida doimiy ravishda Buxoro davlat universiteti Turizm fakulteti, Buxoro turizmi hamkor tashkilotlari assotsiatsiyasi, Turizmni rivojlantirish davlat qo'mitasi Buxoro viloyat hududiy boshqarmasi vakillari ishtirokida maslahatlashuvlar olib borilmoqda. Maslahatlar davomida Buxoro shahrida yangi turmarshrutlarni ishlab chiqish, mavjud marshrutlarni boyitish, ularni keng ommaga tanitish, shahar va viloyatning turistik xaritasini mukammal holga keltirish masalalari ko'rib chiqilmoqda. Ishlab chiqilayotgan turmarshrutlar tematik xarakterga ega bo'lib, Buxoro turistik brendining o'ziga xos tomonlarini qamrab olishiga alohida e'tibor qaratilmoqda.
