Professor Pavel Exner rahbarligidagi mazkur nufuzli ilmiy seminarda f.-m.f.d. (DSc), prof. T.H.Rasulov tomonidan so‘nggi yillarda qo‘lga kiritilgan ilmiy natijalar va istiqbolli rejalar muhokama qilindi. Dastlab Scopus bazasiga kiruvchi “Journal of Mathematical Physics”, “Theoretical and Mathematical Physics” va “Nanosystems: Physics, Chemistry, Mathematics” kabi nufuzli jurnallarda chop qilingan ilmiy natijalar asosida "Spectral analysis of a lattice spin-boson Hamiltonian with at most two photons" mavzusidagi ma'ruza tinglandi. Xalqaro seminarning ikkinchi qismida Fizika-matematika fakul’tetida olib borilayotgan ilmiy-tadqiqot ishlari va bajarilayotgan ilmiy loyihalar taqdimoti o'tkazildi hamda Chexiya Fanlar Akademiyasining Yadro fizikasi instituti bilan kelgusida amalga oshiriladigan hamkorlik yo‘nalishlari belgilab olindi.
Ma’lumot uchun: T.H.Rasulov Chexiya Fanlar Akademiyasi Yadro fizikasi institutining taklifiga binoan joriy yilning 28-iyunidan 2-avgustiga qadar mazkur institutda ilmiy stajirovka o‘tamoqda. Xorijiy safar SOMPATY xalqaro loyihasi tomonidan to‘liq moliyalashtirilgan.
