Ekologik turizm tabiat muhofazasini ta’minlash imkoniyatini beradi, sayyohatchilarning ekologik madaniyatini oshiradi hamda an’analarni saqlab qolishga xizmat qiladi. Hozirda ekoturizmning jahon turizm industriyasidagi hajmi 10 foizdan oshdi, o‘sish sur’atlari esa 2-3 barobar yuqoriroq. Keltirilgan raqamlardan ko‘rib turibmizki, ekoturizm istiqbolli va yuqori daromad keltiruvchi yo‘nalishdir.
Shu munosabat bilan 2024 yilning 10-12 may kunlari prezidentimizning “Respublikaning turizm salohiyatini jadal rivojlantirish hamda mahalliy va xorijiy turistlar sonini yanada oshirishga doir qo‘shimcha chora-tadbirlar to‘g‘risida”gi PQ-135 sonli qarorlari ijrosi hamda yashil makon umummilliy loyihasi doirasida BuxDU rektori Obidjon Xamidov boshchiligida universitetning bir guruh talaba-yoshlari, professor-o‘qituvchilari, ishchi xodimlari Qoraqalpog‘iston Respublikasining Mo‘ynoq tumanida "Buxoro davlat universiteti talaba yoshlarining bog‘i"ni barpo etish, shuningdek, Buxoro viloyatiga biriktirilgan Xo‘jayli tumanida talabalarning madaniy-ma’rifiy tadbirlarini o‘tkazish maqsadida tashrif buyurishdi.
Dastlab BuxDU jamoasi Qoraqalpog‘iston Respublikasining Nukus shahridagi Berdaq nomidagi Qoraqalpoq davlat universitetining faoliyatini yaqindan o‘rganish maqsadida ilmiy tur doirasida bir qator uchrashuvlarni o‘tkazdi.
Dastlab buxorolik delegatsiyani Qoraqalpoq davlat universiteti Ilmiy ishlar va innovatsiyalar bo‘yicha prorektori Izimbet Turdimambetov hamda universitet rahbariyati kutib olishib, bosh bino foyesida delegatsiya uchun qoraqalpoq xalqining milliy madaniy merosini o‘zida aks etgan tadbir tashkil etildi. Ushbu tadbirda universitet tarixi, talabalar soni, fakultetlar hamda yo‘nalishlar boyicha BuxDU jamoasiga ma’lumotlar berildi. Qoraqalpoq davlat universiteti talabalarining ijodi namunalari ko‘rgazmasi tashkil etildi. Uchrashuvda Buxoro davlat universiteti rektori Obidjon Xamidov ham so‘zga chiqib universitet rahbariyatiga minnatdorchilik bildirdi va ikki tomonlama hamkorlik aloqalari yanada rivojlanishi uchun BuxDU doim tayyorligini ta’kidlab o‘tdi. BuxDU Ilmiy ishlar va innovatsiyalar bo‘yicha prorektori T.H.Rasulov ham so‘zga chiqib BuxDU jamoasi Qoraqalpoq davlat universitetini o‘rganish maqsadida bir nechta yo‘nalishlar bo‘yicha guruhlarga ajratilishini aytib o‘tdi. Universitetni o‘rganish davomida talabalar hamda professor-o‘qituvchilar xorijiy tillar, matematika, tarix, iqtisodiyot, filologiya fakultetlarida talabalar ta’lim olishi uchun yaratilgan sharoitlar, markazlar bilan yaqindan tanishishdi.
Muzokaralar davomida kelgusida amalga oshirish mumkin bo‘lgan ustuvor yo‘nalishlar belgilab olindi. Xususan, hamkorlikda loyihalar tanlovida ishtirok etish, yangi avlod o‘quv adabiyotlarini yaratish, nufuzli mahalliy va xalqaro jurnallarda maqolalar nashr qilish, yozgi maktablarda talabalar ishtirokini ta’minlash, OTM talabalar uchun fan olimpiadalarni tashkil qilish kelishib olindi.
Tashrif davomida BuxDU basketbol jamoasi Qoraqalpoq davlat universiteti hamda Nukus davlat pedagogika instituti jamoalari bilan o‘rtoqlik uchrashuvlarini o‘tkazdi. Umumiy natijalarga ko‘ra Qoraqalpoq davlat universiteti jamoasi bilan uchrashuvda BuxDU jamoasi 46:39 hisobi bilan g‘alaba qozondi. Tashkil etilgan ushbu uchrashuv tashkilotchilari Qoraqalpoq davlat universiteti hamda Nukus davlat pedagogika instituti rahbariyatiga o‘z minnatdorchiligimizni bildirdik.
Tadbirlar davomida BuxDU kasaba uyushmasi tomonidan talabalarga ochiq dasturxon hamda Qoraqalpoq, o‘zbek milliy madaniy qo‘shma konserti tashkil etildi. Unda Buxoro davlat universiteti San’atshunoslik fakulteti talabalari hamda professor-o‘qituvchilari va Qoraqalpoq davlat universiteti talabalari ijrosida kuy-qo‘shiqlar namoyish etildi.
Qoraqalpogiston Respublikasiga tashrifning 2-kunida BuxDU yoshlari Mo‘ynoq tumanida Buxoro davlat universiteti uchun ajratilgan ekologik hududda “Yashil makon” ummummilliy loyihasi doirasida BuxDU yoshlarining bog‘i yaratildi. Ushbu aksiyada 80 nafar talabalar, professor-o‘qituvchilar hamda universitet rahbariyati ishtirok etishdi.
Shuningdek, Mo‘ynoq tumaniga tashrif davomida Orol dengizi tarixi muzeyi, “Kemalar qabristoni” Mo‘ynoq ekologiya muzeyida bo‘ldilar. Mo‘ynoq tumani “Ekologiya muzeyi”ning 1980-yillarda doktor Eserkepov tomonidan to‘plangan kolleksiyasi Orol dengizi va Mo‘ynoq shahrining tarixini tasvirlaydi. Ushbu kolleksiyada: milliy liboslar, qadimiy zargarlik buyumlari, uy-ro‘zg‘or buyumlari, qayiq va baliqchilik anjom va aslahalari hamda tarixiy fotosuratlar o‘rin olgan.
“Mamlakatimizning eng shimoliy- g‘arbiy tumanlaridan biri bo‘lgan, bugungi kunda dunyo hamjamiyatini hayratlantirayotgan Mo‘ynoq tumanida joylashib turibmiz, ming afsuslar bo‘lsinki ekologik katastrofaga uchragan Orol dengizining 1960-yildagi holatni ko‘radigan bo‘lsak, 200 kmgacha suv qirg‘oqdan chekingan. Bu yerdagi kemalarni ko‘radigan bo‘lsak, majoziy ma’nodagi kemalar qabristoni, mana shu 50-60 yil oldin bu yerda hayot bo‘lgan qancha flora-faunalar bo‘lgan”, deydi Buxoro davlat universiteti rektori, iqtisodiyot fanlari doktori, prof. Obidjon Xamidov.
“BuxDU professor o‘qituvchilari hamda talaba yoshlari Mo‘ynoq tumaniga tashrif buyurib, cho‘l hududiga chidamli bo‘lgan bir nechta nihollarni olib kelib o‘tqatzmoqdalar. Men o‘ylaymanki bu turdagi tadbirlar, kelajakda albatta ekologiyani tozalashda katta ahamiyat beradi. Bu yerga kelishimizdan asosiy maqsad, cho‘l hududiga chidamli bo‘lgan daraxt ko‘chatlardan olib kelib BuxDU talaba yoshlar bog‘i barpo etilishiga o‘zimizni hissamizni qo‘shib kelmoqdamiz”, deydi Buxoro davlat universiteti Ilmiy ishlar va innovatsiyalar bo‘yicha prorektori To‘lqin Rasulov.
Buxoro davlat universiteti Matbuot xizmati
