Asrlar mobaynida Buyuk ipak yo’li orqali savdogarlar va sayohatchilar, ilm izlovchi tolibi ilmlarni o`ziga jalb etgan Buxoro ayni yillarda maftunkor sayyohlik yo’nalishlaridan biriga aylanmoqda. Shu bois ushbu viloyat turistik salohiyatini yanada rivojlantirish uchun chora-tadbirlar ko`rilmoqda. Ma’lumki, Buxoro davlat universiteti, O‘zbekiston Xalqaro Islom Akademiyasi, Kogon va Romitan tumanlari hokimliklari kelishgan holda turisitik salohiyatni oshirish borasida yo‘l xaritasi ishlab chiqilgan edi.
Yo`l xaritasiga muvofiq, Buxoro davlat universitetiga biriktirilgan Kogon va Romitan tumanlarining turistik salohiyatini oshirish rejasi doirasida amalga oshirilgan ishlarni ko`zdan kechirish maqsadida bugun BuxDU rektori Obidjon Xamidov boshchiligidagi ishchi-guruh ushbu tumanlarda bo`lishdi.
BuxDU Turizm va mehmonxona xo‘jaligi” kafedrasi mudiri N. Ibragimov, shuningdek, “Marketing va menejment”, “Iqtisodiyot”, “Buxgalteriya va audit”, “Agrobiznes va logistika”, Tarix va yuridik fakulteti, Tabiiy fanlar fakulteti, Filologiya, Axborot texnologiyalari fakulteti o‘qituvchilaridan iborat ishchi-guruh Kogon va Romitan tumanlaridagi turizm salohiyati bilan bog‘liq kontentni yaratish maqsadida tumanda mavjud diqqatga sazovor ob’yektlar, ziyorat obyektlari, tarixiy-madaniy yodgorliklar, hududda yashovchi xalqlar etnografiyasi, arxeologik obyektlar, geografik va landshaft o‘ziga xosliklarni inventarizasiya qilishdi. Amaliyotga yuboriladigan talabalarning amaliyot joylarini aniqlash barobarida tadqiqotchilarning dissertatsiyalarida Kogon va Romitan bilan bog‘liq qismlariga aniqlik kiritishdi.
Qaysi soha xodimlari qachon va nimaga o‘qitilishi grafigi tayyorlandi. Ekologik-geografik holat va salohiyat baholanishi bilan bir qatorda nomoddiy meros, xalq og‘zaki ijodi, undan turistik maqsadda qanday foydalanish mumkinligi bo‘yicha tavsiyalar ishlab chiqildi. Maqsadli ko`rsatkichlar belgilandi.
Shuningdek, tashrif mobaynida Romitan tumanida umumiy o`rta ta'lim maktabida bo`lishib, o`quvchilar bilan samimiy suhbatlashishdi. Tumandagi "Turizm" markazi hamda Yoshlar markazi faoliyati bilan tanishishdi.
Darhaqiqat, bu ikki tumanda bu sohada qilingan, qilinayotgan kelgusidagi istiqbolli loyihalar talaygina. Xususan:
- Kogon va Romitan tumanlaridagi diqqatga sazovor obyektlar, tarixiy-madaniy yodgorliklar, hududda yashovchi xalqlar etnografiyasi, arxeologik obyektlar, geografik va landshaft o‘ziga xosliklari to‘g‘risida ma’lumotlar bazasini shakllantirish uchun ishchi guruh tashkil etildi va kontentlar yaratilmoqda.
- Bugungi kunda turistik obyektlarga tegishli kontentlari ma’lumotlari bo‘yicha 12 ta tilga tarjima qilish ishlari boshlab yuborilgan. Ingliz tilida yaratiladigan asosiy kontentning tahriri uchun Buxoro davlat universitetiga o‘zbek adiblarining asarlarini (“O‘tgan kunlar”, “Yulduzli tunlar”) ingliz tiliga o‘girgan mashhur tarjimon Kerol Ermakova jalb qilingan. Koreys tilidagi tahrir uchun Janubiy koreyalik mutaxassis Yu Deok taklif etilgan.
- Ushbu xizmat ko‘rsatish ob’yektlarida band bo‘lgan ishchi-xodimlarni, shuningdek o‘z tadbirkorligini yuritmoqchi bo‘lganlarni o‘qitish maqsadida 4 ta maxsus kurs dasturi ishlab chiqilgan. Ushbu dasturlar uchun respublika hamda xorijiy mutaxassislarning ekspert xulosalari olinib, Kogon hamda Romitan tumanidagi mahallalardan 142 nafar fuqaroning tahsil olishi rejalashtirilgan.
- Turizm xizmati subyektlari ishchi-xodimlari malakasini oshirish va qayta tayyorlash kurslarida BuxDUning xorijiy hamkorlari - Vatel mehmonxona va turizm biznes maktabi (Fransiya), Gunadarma universiteti (Indoneziya), Vakayama universiteti (Yaponiya) va boshqa hamkorlardan yetakchi professor-o‘qituvchilarning mahorat darslarini tashkil etilishi ko`zda tutilgan.
- Zamonaviy mehmonxona binosini qurish uchun universitet hududidan yer maydoni ajratildi.
Buxoro viloyatining turistik salohiyati va jozibadorligini, xususan ziyorat turizmini targ‘ib qiluvchi “Buxoroga tashrif” (Visit Bukhara) elektron onlayn platformasi uchun kontentlar yaratilmoqda.
