2023-yil 20-mart kuni Buxoro davlat universiteti vakillari T.H.Rasulov, E.D.Niyozov, E.B.Dilmurodov va B.Sh.Ganiyevlar Rossiya Federatsiyasi Qozon Federal universitetining ilmiy va innovatsion faoliyati hamda Kimyo institutidagi o‘quv va ilmiy laboratoriyalarida amalga oshiralayotgan ilmiy-tadqiqot ishlar bilan tanishdilar. Ilmiy tadqiqot ishlari bo‘limi boshlig‘i Valiyeva Liliya Raximullovna bilan Qozon Federal universitetida ilmiy-tadqiqot ishlarining yo‘lga qo‘yilishi, ishlab chiqarish korxonalari buyurtmalari asosida bajarilayotgan loyihalar, yosh tadqiqotchilar uchun yaratilgan imkoniyatlar, universitet professor-o‘qituvchilari, tadqiqotchilari, magistrant va talabalarining turli loyihalar va tanlovlarda ishtiroki hamda universitetlarning ilmiy-tadqiqot faoliyatini yangi boshqichga olib chiqish imkoniyatlari yuzasidan fikr almashishdi. Shuningdek, tomonlar ilmiy-tadqiqot yo‘nalishida o‘zaro hamkorlikni yo‘lga qo‘yish, turli innovatsion loyihalarni hamkorlikda amalga oshirish bo‘yicha kelishib olishdi.
Shu kunning o‘zida Butlerov nomidagi Kimyo institutining ilmiy-tadqiqot va innovatsion faoliyati o‘rganildi. O‘quv va ilmiy laboratoriyalarda soha mutaxassislari tomonidan tegishli korxonalar buyurtmalari asosida bajarilayotgan ilmiy-tadqiqot ishlari bilan tanishildi hamda BuxDU olimlari bilan kimyo va neftgaz sohasida hamkorlik yo‘nalishlari muhokama qilindi.
