2016 yil 26-29 may kunlari Farg'ona shahrida oliy o'quv yurtlari talabalari o'rtasida – “Universiada – 2016” musobaqalarning final bosqichi bo'lib o'tadi. Unda Toshkent shahri, Qoraqalpog'iston Respublikasi va viloyatlardan jamoalar sportning 15 ta turi bo'yicha bellashadi. O'zbekiston prezidenti Islom Karimov aytganlaridek, yurtimizda shakllangan “Umid nihollari”, “Barkamol avlod” va Universiada sport o'yinlarini o'z ichiga olgan uch bosqichli noyob tizimning bamisoli qudratli to'lqinga aylanib million-million bolalarni o'z safiga qamrab olayotgani, ularning ham jismoniy, ham ma'naviy sog'lom bo'lib ulg'ayishi uchun xizmat qilmoqda. Ayniqsa, bu tizimning yuqori bosqichi bo'lgan Universiada musobaqalari yoshlar uchun tom ma'noda chiniqish va kamolot maktabiga aylangan.Universiada o'yinlari 2000 yili Namangan viloyatida, 2002 yili Buxoro, 2004 yili Samarqand, 2007 yili Toshkent shahrida, 2010 yili Andijon, 2013 yili Buxoro viloyatida o'tkazildi. Dastlab Universiada musobaqalari 9ta sport turi bo'yicha tashkil etilgan bo'lsa, bugungi kunga kelib sport turlari 15 taga etdi. Bular sportning basketbol, voleybol, erkin kurash, yunon-rum kurashi, dzyu-do, taekvondo, engil atletika, og'ir atletika, tennis, stol tennisi, futbol, gandbol, shaxmat, suzish va boks turlaridir.Joriy yilda Farg'onada ettinchi marotaba o'tkazilayotgan talabalar o'rtasidagi musobaqa tom ma'noda go'zallik va sport bayramiga aylandi.Farg'ona shahrida mazkur musobaqani yuqori saviyada o'tkazish uchun aniq chora-tadbirlar belgilanib, muayyan ishlar amalga oshirildi. Farg'ona davlat universiteti, Farg'ona politexnika instituti, Farg'ona olimpiya zaxiralari kollejida katta tayyorgarlik ko'rildi. Sport zallari zamon talablari asosida ta'mirlanib, jihozlandi. Farg'ona davlat universitetida 3 ming 200 o'rinli futbol maydoni, yopiq suzish havzasi, uchta voleybol maydoni va engil atletika yo'laklari qurilib, foydalanishga topshirildi.Musobaqa ishtirokchilarining yashashi, ovqatlanishi va mazmunli dam olishi uchun qulay sharoitlar yaratishga alohida e'tibor qaratildi. Farg'ona davlat universiteti va Farg'ona politexnika institutining talabalar turar joyi binolari zamonaviy ta'mirdan chiqarildi.Viloyat markazida keng ko'lamli obodonlashtirish va ko'kalamzorlashtirish ishlari amalga oshirilib, xiyobon va ko'chalarda gulzorlar tashkil etildi. Farg'ona, Ma'rifat, Murabbiylar kabi markaziy ko'chalar zamonaviy arxitektura talablari asosida ta'mirlanib, qariyb 5 kilometrlik yo'l rekonstruktsiya qilindi. Barcha ko'chalarga Universiada, sport, yoshlikni targ'ib etuvchi pannolar, shiorlar o'rnatildi.Sport musobaqalarida 1068 nafar sportchi va murabbiylar, 155 nafar hakamlar hamda yurtimizning mashhur sportchilari, ommaviy axborot vositalari xodimlari qatnashishi rejalashtirilgan.Sport musobaqalari 12ta sport inshootlarida o'tkaziladi.Musobaqalar jarayonida madaniy-ma'rifiy tadbirlar dasturiga asosan viloyatning barcha shahar va tumanlarida mashhur san'atkorlar ishtirokida bayram shodiyonalarini tashkil etish rejalashtirilgan.Shuningdek, Universiada ishtirokchilari va mehmonlarining Farg'ona va Marg'ilon shaharlarida joylashgan tarixiy obidalar, muzeylar, teatrlar hamda yangi barpo etilgan inshootlar bilan tanishishlari ham amalga oshiriladi.Ma'lumki, sport musobaqalari ochilishida yoqiladigan mash'ala Parkent tumanidagi Quyosh inshooti tabiiy nur quvvati bilan yoqiladi. Ayni kunlarda Universiada mash'alasi Parkentdan Farg'ona shahrigacha keladigan yo'l xaritasi tuzildi. Mash'ala marshruti masofasi 364,5 km bo'lib, shundan 338,5 km avtomobil va 26 km sportchilar estafetasi tashkil etadi. Toshkent, Namangan, Andijon viloyatlari va Farg'ona viloyati hududlarida mash'ala sharafiga keng jamoatchilik ishtirokida madaniy-ma'rifiy tadbirlar o'tkaziladi. Mash'alani eltadiganlar orasida sportchi yoshlar bilan bir qatorda Farg'onaning Dang'ara tumani, Qo'qon shahri, Uchko'prik, Bag'dod, Rishton, Oltiariq tumanlarida yashovchi taniqli insonlar, sport va mehnat faxriylari ham bor. Ko'ngillilar mash'ala o'tadigan ko'chalardagi aholini bu haqda xabardor qildilar.Universiada musobaqalarida nafaqat sportchilar soni oshmoqda, balki qo'lga kiritilgan medallar soni, mamlakat rekordlari o'rnatilmoqda. O'zbekistonning boks, erkin va yunon-rum kurashi, dzyudo, shaxmat, badiiy gimnastika, og'ir atletika bo'yicha sport maktablari tarbiyalanuvchilari xalqaro musobaqalarda o'z mahoratlarini yaqqol namoyon etib, bu borada mamlakatimizda amalga oshirilgan islohotlar nechog'lik to'g'ri ekanligini isbotlab berishmoqda.O'zbekistonda joriy etilgan uch bosqichli sport musobaqalarida qatnashib, keyinchalik xalqaro maydonlarda o'zini ko'rsatgan sportchilardan dzyudo bo'yicha ikki karra jahon chempioni, Pekin hamda London Olimpia o'yinlari sovrindori Rishod Sobirov, jahon chempionati sovrindori Dilshod Choriev, o'zbek sportchi qizlari orasida birinchi xalqaro grossmeyster Nafisa Mo'minova, Osiyo o'yinlari sovrindori, Xalqaro shaxmat federatsiyasi ustasi Nodira Nodirjonova, belbog'li kurash bo'yicha uch karra jahon chempioni Rustam Umarov, engil atletika bo'yicha yoshlar o'rtasida jahon chempioni Svetlana Radzivil, Osiyo o'yinlari g'olibasi Yuliya Tarasova, suzish bo'yicha ko'plab rekordlar sohibasi Rano Amonova, Yulduz Qo'chqorova, badiiy gimnastika bo'yicha o'smirlar o'rtasida xalqaro musobaqa g'olibasi Aziza Mamajonova bugun yoshlarning faxriga aylanishgan.Mamlakatda sog'lom avlodni voyaga etkazishda jismoniy tarbiya va sportning rolini oshirish, bu boradagi mavjud moddiy-texnik baza va kadrlar salohiyatini jahon standartlari asosida yanada mustahkamlash, eng muhimi, sportga mehr har bir bola, har qaysi oila hayotiga chuqur kirib borishiga erishish borasidagi amalga oshirilgan chora-tadbirlar, chuqur o'ylangan islohotlar samarasi bugun sportchilarimizni qo'lga kiritgan yutuq va g'alabalarida o'z aksini topmoqda.O'zbekiston Bolalar sportini rivojlantirish jamg'armasi ana shunday barkamol avlodni voyaga etkazishda muhim o'rin tutmoqda. Jamg'arma tashkil etilganidan buyon mamlakatimizda 2000 ga yaqin sport ob'ektlari barpo etildi va qayta rekonstruktsiya qilindi. Ular zamonaviy sport jihozlari va anjomlari bilan ta'minlandi. Bu, shubhasiz, bolalarning sport bilan muntazam shug'ullanib, salomatligini mustahkamlashi, yoshlarimizning jahon maydonlarida ulkan yutuqlarni qo'lga kiritishi, xalqaro miqyosda Vatanimiz nufuzining yanada oshishiga zamin yaratdi. Bugun mamlakatimizda 2 milliondan ziyod bola sportning 59 turi bilan muntazam shug'ullanmoqda. Bu 2003 yilga solishtirganda qariyb 1,5 baravarga ko'p demakdir.Aytish lozimki, sportchilarning g'alabalari sportni keng ommalashtirishda muhim o'rin tutadi. Xalqaro musobaqalarda g'olib bo'lib, bayrog'imizni baland ko'tarib, quvonchdan ko'ziga yosh olgan yigit-qizlarni ko'rganda ota-onalarda, bolalarda ham sportga havas uyg'onadi. Bunday g'alabalar O'zbekistonning xalqaro maydondagi obro'yini yanada oshirishga xizmat qiladi. Yoshlarda vatanparvarlik, fidoyilik tuyg'ulari yanada mustahkam qanot yozadi. Universiada o'yinlariga tayyorgarlik ko'rish jarayoni va musobaqalar davomida uning ishini yoritib boradigan veb-sayt guruhi tashkil etilgan. Universiadaga tayyorgarlik, uning ishtirokchilari, musobaqalar o'tadigan manzillar va boshqa ma'lumotlar bilan veb-sayt orqali tanishish mumkin. www.universiada-2016.uzMusobaqa arafasida va uning tezkor natijalari to'rtta xorijiy tillarga tarjima qilib butun dunyoga tarqatib turiladi.“Universiada-2016” o'yinlari matbuot xizmati
