Bosh qonunimiz — O‘zbekiston Respublikasi Konstitutsiyasining qabul qilinishi muhim siyosiy, huquqiy hujjat sifatida jahonda yangi, suveren, istiqboli porloq davlat dunyoga kelganining o‘ziga xos shahodatnomasidir. O‘zbekiston Respublikasi Konstitutsiyasi mustaqil yurtning birinchi Konstitutsiyasi hisoblanadi.
Bugun BuxDUda Konstitutsiyamiz qabul qilingani o‘ttiz yilligi munosabati bilan Tarix va yuridik fakulteti jamoasi va talabalari tomonidan “O‘zbekiston Respublikasi Konstitusiyasi mamlakat taraqqiyoti va jamiyat farovonligining huquqiy kafolati” mavzusida huquqiy-ma’rifiy bayram tadbiri bo`lib o`tdi. Tadbir O`zbekiston Respublikasi Davlat madhiyasi bilan ko`tarinki ruhda boshlandi.
Hayotimiz qomusi bo‘lgan Konstitutsiyamiz mustaqillik yillarida erishgan barcha yutuq va marralarimizning mustahkam huquqiy poydevori bo‘lib kelayotganini hammamiz yaxshi bilamiz va yuksak qadrlaymiz.
Aynan Konstitutsiyamizga tayanib, Prezidentimiz boshchiligida bundan olti yil oldin mamlakatimizda Harakatlar strategiyasi qabul qilindi va Yangi O‘zbekistonni barpo etish bo‘yicha keng ko‘lamli islohotlar boshlandi.
Ayni vaqtda biz Konstitutsiyamiz normalarini hayotga to‘la tatbiq etish, jamiyatda qonun va adolat ustuvorligini, inson huquq va manfaatlari, uning qadr-qimmatini yanada samarali ta’minlash borasida hali ko‘p ish qilishimiz kerakligini yaxshi tasavvur qilamiz. Oldimizda turgan vazifalarni amalga oshirish uchun Yangi O‘zbekiston taraqqiyot strategiyasi doirasida keng ko‘lamli islohotlarimizni izchil davom ettiramiz.
Obidjon Xamidov,
BuxDU rektori
Tadbir mobaynida Konstitutsiyamizga oid video-rolik namoyish etildi. BuxDU va Buxoro viloyat Ichki ishlar boshqarmasi, viloyat Prokuraturasi, viloyat Sudi, viloyat Adliya boshqarmasi, viloyat Milliy gvardiya boshqarmalari o‘rtasida hamkorlik memorandumlari imzolandi.
Fakultet talabalari tomonidan Konstitutsiyamizga taklif qilinayotgan o`zgarishlar xususida badiiy chiqishlar namoyish etildi. Vatan madh etilgan kuy va qo`shiqlar yig`ilganlarga yuqori kayfiyat bag`ishladi.
Milliy Gvardiya harbiy xizmatchilarining vatanparvarlik ruhidagi chiqishlari tomoshabinlarda iliq taassurot uyg`otdi.
