Xalqaro hamkorlik bo‘yicha proryektor A.Jo‘rayev 7-12 iyun kunlari O‘zbekiston Respublikasi delegatsiyasi tarkibida texnika yo‘nalishi bo‘yicha O‘zbekiston-Turkiya oliy taʼlim muassasalari forumida ishtirok etish uchun Turkiya Respublikasida xizmat safarida bo‘lib qaytdi.
7-iyun kuni Turkiya Respublikasiga yetib borgan A.Jo‘rayev shu kunning o‘zida Pamukkale universiteti rahbariyati bilan uchrashuvlar o‘tkazish uchun Denizli shahriga yetib bordi. 7-8 iyun kunlari Pamukkale universiteti rektori Ahmet Kutluhan bilan, xalqaro hamkorlik boshqarmasi boshlig‘i Zeha Yakar, shuningdek Iqtisodiyot fakulteti, Adabiyot va tabiiy fanlar fakultetida uchrashuvlar o‘tkazildi, ilmiy laboratoriyalar va sport majmualari bilan tanishildi.
Pamukkale universiteti 1992-yilda tashkil etilgan bo‘lib, bugungi kunda talabalar soni 43,2 ming nafarni tashkil etadi. Universitet tarkibida 6 ta institut va 19 ta fakultet faoliyat ko‘rsatadi. Universitet jahon akademik reytinglarida 1500-1800 guruhlaridan o‘rin olgan.
Pamukkale universiteti prof. A.Kutluhan Buxoro davlat universitetini O‘zbekistondagi yetakchi oliy taʼlim muassasalaridan biri sifatida bilishini taʼkidlab, o‘zaro hamkorlikni kuchaytirish niyatida ekanliklarini bildirib o‘tdi. Rektor A.Kutluhan tomonidan Pamukkale universiteti xalqaro hamkorlik boshqarmasiga o‘zaro hamkorlik shartnomasi, shuningdek Mavlono akademik almashinuv shartnomasi va Erasmus+ dasturi kelishuvini tayyorlash bo‘yicha ko‘rsatma berildi. Pamukkale universitetining 2019-2023 yillar uchun stratyegik rivojlanish dasturining asosiy tamoyil va ko‘rsatkichlari tanishtirildi va mazkur dastur BuxDUda foydalanish uchun taqdim etildi.
Filologiya va tabiiy fanlar fakultetida “Zamonaviy turkiy tillar va adabiyot” kafedrasi mudiri Nergis Biray bilan uchrashuv o‘tkazildi. 2021-yilda N.Birayning tashabbusi bilan BuxDU olimlari ham ishtirokida yirik simpozium o‘tkazilgan edi. 2022-yilda ham shunday simpozium o‘tkazilishi hamda BuxDU tashkilotchilar qatoriga kiritilishi rejalashtirildi. N.Biray BuxDU kutubxonasi uchun o‘zining “Zamonaviy turkiy tillar” nomli kitobini sovg‘a qildi.
Iqtisodiyot fakultetida A.Jo‘rayev “Iqtisodiyot” kafedrasi mudiri Reshat Jeylan bilan uchrashdi. Fakultetda magistratura va doktorantura bosqichlarida dissertatsiya tayyorlash bo‘yicha qabul qilingan yo‘riqnomalar bilan tanishildi. Shuningdek, yakuniy nazoratlarni tashkillashtirish bo‘yicha tajribani o‘rganish maqsadida “Iqtisodiy o‘sish” fanidan nazorat jarayonlari ko‘zdan kechirildi. Fakultet doktorantlari bilan uchrashuvlar o‘tkazildi hamda tadqiqotlarning asosiy yo‘nalishlari bo‘yicha fikr almashildi. Taʼkidlash joizki, bugungi kunda Pamukkale universitetida kafedralarni pedagog xodimlar bilan taʼminlashda taklifning talabdan oshishi natijasida falsafa doktori dissertatsiyasini himoya qilgan yoki yaqinda himoya qiluvchi tadqiqotchilar o‘qituvchi lavozimiga o‘tishlari uchun yangi ish o‘rinlari ochilishini kutib qolishmoqda. A.Jo‘rayev logistika, moliya kabi yo‘nalishlarda falsafa doktori dissertatsiyasini himoya qilish arafasida turgan yosh tadqiqotchilarni o‘z pedagoglik faoliyatlarini boshlash uchun Buxoro davlat universitetiga taklif qildi.
9-10 iyun kunlari prorektor A.Jo‘rayev Izmir shahrida O‘zbekistonning 20 ga yaqin, Turkiyaning 45 dan ortiq oliy taʼlim muassasalaridan tashrif buyurgan rektor va prorektorlar, oliy taʼlim vazirliklari vakillari ishtirokida o‘tkazilgan O‘zbekiston-Turkiya taʼlim forumida ishtirok etdi. Forumda shuningdek Izmir shahri va atrofidagi tuman va shaharlardan ishbilarmonlar, ishlab chiqarish korxonalari, tadbirkorlar uyushmalari vakillari ham ishtirok etishdi.
Forum davomida prorektor A.Jo‘rayev tomonidan BuxDU va Anadolu universiteti o‘rtasida hamkorlik shartnomasi, Egey universitetining bir qancha fakultetlari bilan anglashinuv memorandumlari imzolandi.
Prorektor A.Jo‘rayev tomonidan Buxoro davlat universitetining taqdimoti o‘tkazilishi natijasida Turkiyaning bir ilg‘or oliy taʼlim muassasalari vakillari tomonidan hamkorlik o‘rnatishga qiziqish bildirildi. Shundan kelib chiqqan holda, A.Jo‘rayev Sakarya amaliy fanlar universiteti M.Saribiyik, 18 may universiteti rektori Y.Unal, Isparta amaliy fanlar universiteti rektori I.Diler, shuningdek Marmara universiteti, Bahcheshehir universiteti, Yashar universiteti va boshqa yetakchi oliy taʼlim muassasalari vakillari bilan uchrashuvlar o‘tkazdi.
Forum mezboni Egey universiteti vakillari bilan ham ko‘plab istiqbolli rejalar muhokama qilindi. Shu jumladan, jismoniy madaniyat va sport, turizm, iqtisodiyot, tabiiy fanlar yo‘nalishidagi fakultetlar dekanlari va kafedra mudirlari bilan uchrashuvlar samarali o‘tdi. Dokuz Eylul universiteti (9-sentabr universiteti) professori, Ijtimoy fanlar tadqiqot markazi asoschisi, ilmiy ishlariga iqtiboslar soni bo‘yicha Turkiyada ikkinchi o‘rinda turuvchi (h-indeksi 49, h-10 indeksi 192) prof. J.Aktan bilan ham ilmoy tadqiqotlar bo‘yicha suhbatlashildi.
Taʼkidlab o‘tish joizki, Izmir va qo‘shni viloyatlarda qayta tiklanuvchi energiya manbalaridan samarali foydalaniladi. Aholi yashovchi uylarning katta qismida suv isitish uchun ham quyosh kollektorlaridan foydalaniladi. Qishloq xo‘jaligi yuqori darajada rivojlangan bo‘lib, bu sohada ilm-fan yutuqlaridan keng foydalaniladi. Egey universiteti vakillari bilan yaqin iyun oyida BuxDU olimlari bilan onlayn uchrashuvlarni tashkil qilish hamda ularning natijasiga ko‘ra ustivor yo‘nalishlardagi hamkorlikning asosiy ko‘rsatkichlari bo‘yicha kelishib olish rejalashtirildi. So‘ng ushbu aniq chora-tadbirlar BuxDU va Egey universiteti o‘rtasida imzolanadigan hamkorlik kelishuviga asos bo‘lib xizmat qiladi.
Prorektor A.Jo‘rayev 12-iyun kuni Buxoro shahriga qaytib keldi.
Izoh: A.Jo‘rayevning Turkiya Respublikasiga xizmat safari bilan bog‘liq xarajatlar (yo‘l, mehmonxona va kunlik xarajatlar) Oliy ma o‘rta maxsus taʼlim vazirligining 2022 yil 31-maydagi 2/24-4/4-1015 raqamli xati asosida universitet budjetdan tashqari mablag‘lari hisobidan qoplandi.
