Avval xabar qilinganidek, 26-fevral kuni “Muxbir Daliyev” telegram kanalida “Buxoro davlat universitetida korrupsiya avjida” sarlavhasi ostida xabar e’lon qilingan, unga nisbatan BuxDU tomonidan tezkor munosabat bildirilgan hamda ushbu masalani o‘rganib chiqish uchun BuxDU rektori boshchiligida ishchi guruh tuzilganligi ma’lum qilingan edi.
Ishchi guruh a’zolari tomonidan mazkur xabarda ko‘rsatib o‘tilgan holatning kelib chiqish sabablari va haqqoniyligi o‘rganib chiqildi.
O‘rganish jarayonida xabarda nomi keltirilgan BuxDU 9-5MTS-19 guruhi talabalari bilan suhbatlashildi. Talabalarning bildirishicha, xabarda keltirilgan yozishmalar guruh talabalari orasidagi shunchaki asossiz suhbat jarayoni bo‘lib, guruh sardori hamda o‘qituvchilar orasida imtihonlardan ijobiy baho olish uchun 50 ming so‘mdan pul mablag‘lari berish borasida hech qanday kelishuv bo‘lmagan.
Maqolada nomlari ketirilgan pedagog-xodimlar Kamilova va Nigmatovalar faoliyati o‘rganilganda, Kamilovaning ushbu guruhda bahorgi semestrda darsi yo‘qligi, pedagogning nomi xabarga ilova qilingan yozishmalarda asossiz ravishda keltirilganligi aniqlandi. Nigmatovaning esa o‘qish jarayoni hali boshlanmaganligi sababli talabalar bilan umuman muloqotda bo‘lmaganligi, pul mablag‘lari talab qilmaganligi aniqlandi. Qolaversa, bahorgi semestr dars jarayonlari tasdiqlangan jadval asosida joriy yilning 28-fevral sanasidan boshlanishi belgilangan bo‘lib, yakuniy nazorat imtihonlari esa 28-martdan boshlanadi.
Guruh sardori R.M.dan telegram guruhi orqali yozishmalari haqida so‘ralganida, u o‘z guruhidagi yosh bolali kursdoshlariga rahmi kelganligi, pul mablag‘lari evaziga bo‘lsa ham baholarni olib bermoqchi bo‘lganligi va talabalarga asossiz ravishda 50 ming so`mdan pul yig‘ishni taklif qilganligi, o‘qituvchilardan hech kim pora talab qilmaganligini bildirdi.
Ta’kidlash joizki, BuxDU sha’niga bunday putur yetkazish maqsadida amalga oshirilgan asossiz harakatlar oldin ham uchragan. Masalan, 2021-yilning noyabr oyida Tarix va madaniy me’ros fakulteti o‘qituvchisi Z.Sh.Ahmadova tomonidan tarqatilgan asossiz xabarlar ham o‘z tasdig‘ini topmaganligi sababli unga nisbatan Jinoyat ishlari bo‘yicha Buxoro shahar sudi tomonidan tegishli jazo chorasi qo‘llanilgan.
Hozirda universitetda korrupsion holatlarni oldini olish va bartaraf etish, shaffoflikni ta`minlash maqsadida Korrupsiyaga qarshi kurashish “Komplaens nazorat” bo‘limi tashkil etilgan bo‘lib, mazkur bo‘lim tomonidan pedagog va talabalar orasida ta’magirlik, poraxo‘rlik va moddiy manfaatdorlik kabi holatlarning yuz berishining oldini olish hamda bartaraf etish maqsadida rasmiy sayt, telegram kanal, telegram bot, elektron pochta, ishonch telefonlari, bo‘limga og‘zaki va yozma ravishda murojaat qilish imkoniyatlari yaratilgan (@buxdu_anti_corbot, https://t.me/BuxDU_KorrupsiyagaQarshiKurash, +998652212990, +998973030660, buxdukorrupsiyagaqarshikurash@gmail.com).
Аytish joizki, poraxoʼrlik va pora olish-berishda vositachilik qilish jamiyat uchun ijtimoiy xavfi yuqori va og‘ir oqibatlarga olib keluvchi jinoyatlar toifasiga kiradi. Ushbu jinoyatlar jamiyatning maʼnaviy-axloqiy negiziga putur yetkazibgina qolmay, yangi jinoiy qilmishlar sodir etilishiga ham yo‘l ochib berishi mumkin. Shu bois, pora berganlik va pora olish-berishda vositachilik qilganlik uchun jinoiy jazolarning kuchaytirilgani salbiy holatlarning oldini olishga xizmat qilishi bilan ahamiyatlidir. Mazkur Qonunga muvofiq, Jinoyat kodeksining 211-moddasida nazarda tutilgan jazo choralari birmuncha kuchaytirildi va 210-moddaning sanksiyasi bilan tenglashtirildi.
Talabalarning “Muxbir Daliyev” telegram kanalida keltirigan asossiz ayblovlari huquqiy baho berish uchun huquq-tartibot idoralariga yuborilishi ma’lum qilinadi.
BuxDU Matbuot xizmati
