Assalomu alaykum, vatandoshlar!Muhtaram ustozlar!Qadrdon talabalar!Avvalo, barchangizga “O`zbek tili bayrami” kuni muborak bo‘lsin!Til ajdodlardan avlodlarga qolgan beqiyos milliy boylik, milliy qadriyatdir. Bu tengsiz merosni asrash, uning barhayotligi uchun munosib hissa qo‘shish har bir o`zbekning chin insoniylik burchidir. Mamlakatimiz davlat mustaqilligi sari qo‘yilgan ilk qadam – «Davlat tili haqida»gi qonunning qabul qilinishi va o‘zbek tiliga davlat tili maqomining berilishi edi. Mana, ushbu tarixiy voqeaga 32 yil to‘ldi. Bu shunchaki hodisa emas, chin ma’noda, buyuk kelajakning poydevori edi.Bugungi kunda dunyo bo‘yicha o‘zbek tilida so‘zlashuvchilarning umumiy soni 50 milliondan oshdi. Bu shunchaki gap emas, tilimiz davlat tili maqomiga ega bo‘lgan yuzta tildan biri ekanligi yuragimizga iftixor tuyg‘usini soladi. Milliy tilimiz – bu sobit e’tiqodimiz, tarixiy qiyofamiz, muqaddas qadriyatlarimiz demakdir.XVI asrda yashagan fransuz olimi Dyu Belle “Ona tilini himoya qilish Vatanni himoya qilish bilan barobardir”. “Odamning o‘z mamlakatiga bo‘lgan mehrini ona tiliga bo‘lgan mehrisiz anglash mumkin emas”, – deb yozgan fikrlarida ulkan mazmun mujassamligini ko‘rish mumkin.Haqiqatdan ham, tilni millatdan, millatni tildan, til va millatni esa Vatandan ayro tasavvur etib bo‘lmaydi.Ulug‘ o‘zbek yozuvchisi Abdulla Qahhor maqolalaridan birida Chet tillar pedagogika instituti talabalariga xitoban “…sizlar joylarga chet tillar bilan birga, balki birinchi navbatda o‘z ona tilimizga – o‘zbek tiliga cheksiz muhabbat tuyg‘usini olib boringlar! O‘zbek tili g‘oyat boy, nihoyatda chiroyli, har qanday fikr-u tuyg‘uni ifoda qilishga qodir ekanini amalda ko‘rsatinglar”, -deb ta’kidlaydi.Keyingi yillarda davlatimiz tomonidan o‘zbek tiliga berilayotgan e’tibor e’tirofga sazovor. Birgina 2019-yil 21-oktyabr kuni Prezidentimiz tomonidan imzolangan “O‘zbek tilining davlat tili sifatidagi nufuzi va mavqeyini tubdan oshirish chora-tadbirlari to‘g‘risida”gi Farmoni bunga yaqqol misol bo‘la oladi. Xususan, mamlakatimizda tilimizga bo‘lgan hurmatni yanada yuksaltirish, aholining savodxonlik darajasini oshirish borasida keng ko‘lamli vazifalar ijrosi ta’minlanmoqda. Vazirlar Mahkamasida Davlat tilini rivojlantirish departamenti tuzilmasining tashkil etilgani oʻzbek tilining nufuzini oshirish, davlat tili toʻgʻrisidagi qonun hujjatlariga rioya qilinishi, sohaga oid muammolarni tahlil etib, bu borada yagona davlat siyosati amalga oshirilishini taʼminlash uchun xizmat qilmoqda.Davlat rahbarining bu yo‘nalishdagi ishlar nazoratini o‘z qo‘liga olib, tegishli tuzilmalar tuzilgani, mutasaddilar tayinlanib, vakolatlar, vazifalar, chora-tadbirlar belgilangani yurtboshimiz vatanparvarligi va millatsevarligining amaliy ifodasidir.Yuragimiz tarjimasi, milliy gʻururimiz – oʻzbek tiliga davlat tili maqomi berilganining oʻttiz ikki yilligi, “21-oktyabr – Oʻzbek tili bayrami” munosabati bilan universitetimiz professor-o‘qituvchilarini, xodimlarini, talaba-yoshlarimizni va barcha vatandoshlarimizni chin qalbimdan tabriklayman. O`zbek tilimiz hamisha barhayot bo`lsin!Obidjon XamidovBuxoro davlat universiteti rektori, iqtisodiyot fanlari doktori, professor
