23.12.21, Payshanba kuni Buxoro davlat universiteti Xorijiy tillar fakultetida Amerika Elchixonasi xomiyligi yordamida o’z faoliyatini olib borayotgan “Drama Club” o’zining uchinchi sahna ko’rinishini fakultet o’qituvchi va talabalari, klub a’zolarining ota-onalari, yaqin qarindoshlari hamda keng jamoatchilikga taqdim etdi. Ushbu spektaklni tomosha qilish uchun BuxDU Rektori O.X.Xamidov ham ishtirok etdilar. “Drama Club” birinchi binodagi faollar zalida mashhur va zabardast amerikalik yozuvchi Nesional Hosorn qalamiga mansub “Scarlet letter” asari asosida o’zining spektaklini namoyish etdi. O’n ikki sahna ko’rinishi orqali asarda sodir bo’lgan voqealar jonlantirildi. Xorijiy tillar fakulteti 1-2 kurs talabalari Jasmina Raximova, Suxrob Sa’dullayev, Amirislombek Bekmirzayev, Nasullobek Rajabov, Amira Xalimova, Jasmin Saidova, Daler Baxshilloyev, Dildora Muratova, Mohinur Abdullayeva, Roxat Rashidova, Parvina Sharipova, Amirbek Aliyev, Dmitriy Azaryanlar to’liq ingliz tilida 1.5 soat davomida turli rollarni mahorat bilan, jonli tarzda ijro etishdi. Ushbu sahna ko’rinishlari orqali XIX asr boshida AQSh jamiyatidagi illatlar, ayollarning tahqirlanishi, ularga nisbatan zo’ravonlik qilinishi va boshqa salbiy holatlar namoyish etildi va tanqid ostiga olindi. Asar bosh qahramoni Ester Prin o’z xatosi uchun butun jamiyat tomonidan tahqirlanadi, uning bo’yniga Boston shahri qonunlariga ko’ra “A” harfi osib qo’yiladi va u uzoq yillar davomida o’z qilmishidan pushaymon bo’lishi uchun turli azob-uqubatlarga duchor bo’ladi. Spektakl fojiaviy drama ko’rinishda bo’lganligi sababli bir nechta kuchli ma’noli sahnalarga ega bo’ldi. Dastur oxirida barcha muxlislar rol ijro etgan aktyor va aktrisalarni qizg’in olqishlashdi. “Drama Club” granti sohibi, ingliz tilshunosligi kafedrasi katta o’qituvchisi, Xorijiy tillar fakulteti o’quv ishlari bo’yicha dekan o’rinbosari f.f.f.d. (PhD) M.M.Tursunov spektakl oxirida talabalarni birma-bir tanishtirib, yoshlarni san’atning teatr turiga qiziqtirish ularning darsdan tashqari vaqtlarini mazmunli o’tkazishlariga hamda xorijiy tilni yanada mukammalroq o’rganishlariga zamin yaratishini ta’kidlab o’tdi. Tadbir so’nggida Buxoro davlat universiteti Rektori, iqtisod fanlari doktori, professor O.X.Xamidov so’zga chiqib, talabalarning aktyorlik mahoratiga va til bilish darajasiga yuksak baho berib, bunday spektakllar yoshlarning til o’rganishiga, ularning yanada bilimli bo’lishiga zamin yaratishini ta’kidlab o’tdilar. “Drama Club”ning mazkur spektakli Xayriya uchun tashkil etilganligini ham ta’kidlab o’tish kerak, maxsus “Charity box” (Xayriya qutisi) tadbir oldidan tashkil etildi, yig’ilgan mablag’lar bolalar uyidagi bolajonlarga Yangi Yil sovg’alari uchun sarflandi. BuxDU Matbuot xizmati
