Inson zotining komil shaxs bo‘lib voyaga yetishi, yetuk kasb egasi bo‘lib jamiyatda o‘z o‘rnini topishi, eng avvalo, o‘qituvchilarning mislsiz mehnatiga bog‘liq. Bugun yangi O‘zbekistonning ravnaqi, gullab yashnashi yo‘lida farzandlarimizni intellektual salohiyatli barkamol mutaxassislar etib tarbiyalashdek ulug‘ kasbga umrlarini baxshida etgan ustoz-murabbiylarimiz faoliyati har qachongidan ko‘proq qadr-e’tiborga loyiq. Dunyoda shunday kasblar borki, rohatidan mehnati, muvaffaqiyatidan zahmati ko‘p. Ustoz-u murabbiylarning fidoyi mehnatini ham shunga qiyoslash mumkin. Bugun kim, qayerda, qanday vazifada ishlamasin, qachondir maktabda o‘qigan, ustozlar tarbiyasini olgan. Ilk bor maktabga borgan kunni, qo‘liga qalam berib, yozishni, o‘qishni o‘rgatgan o‘qituvchisini eslamaydigan odam topilmasa kerak. Ustoz-murabbiylarning zakiy ilmi, ta’lim-tarbiyasi, qalb qo‘ri ila bergan saboqlari tufayli unib-o‘samiz, jamiyatda o‘z o‘rinimizni egallaymiz. Hazrat Navoiy bobomiz ta’biri bilan aytganda, dunyoning jamiki boyligi va xazinasi bilan ham ularning olijanob mehnati haqini ado etib bo‘lmaydi. Darhaqiqat, millionlab farzandlarimiz qalbiga ilm-fan ziyosini singdirib, ularni el-yurtga munosib insonlar etib tarbiyalayotgan zahmatkash va olijanob ustozlarimizga har qancha tahsinlar aytsak, arziydi.Muhtaram ustozlar, ilmsevar kasbdoshlar! Bizga ma’lumki, mamlakatimizda ta’limni rivojlantirish istiqboli davlatimiz siyosatining eng muhim masalalaridan biriga aylangan. Muhtaram Prezidentimizning soha rivojiga yuksak e’tiborlari natijasi bo‘lgan, qabul qilingan qarorlarini hayotga samarali joriy qilish, ularga bamisoli jon baxsh etishda, avvalo, Siz aziz Ustoz va murabbiylarga, Sizlarning bilim va tajribangiz, iste’dod va mahoratingizga suyanamiz. Ilm chegarasiz ummon, tubsiz quduqdir, uni to‘liq va mukammal egallashga inson umri kamlik qiladi. Bugun biz yashayotgan zamon har daqiqada innovatsion yangilik bilan yuzlashmoqda. Ayniqsa, ilm-fanda olamshumul bir qator yutuqlarga erishilmoqda. Xabaringiz bor, muvaffaqiyatlarni qarshi olayotgan, ulkan fan olamida ilmiy maktab yarata olgan, intellektual salohiyatga ega bo‘lgan Buxoro davlat universiteti ham respublikada tayanch oliy ta’lim muassasasi hisoblanadi. 2021-yilda fan olimpiadalarida Respublikada 2-o‘rinni qo‘lga kiritdik. Yangilanayotgan O‘zbekiston iqtisodiyotini jadal rivojlantirish, qisqa muddat ichida uni dunyo tan oladigan mamlakatlar darajasiga olib chiqish uchun ilmiy innovatsiyaning tub mohiyatini ochib bergan davlatimiz rahbari o‘z murojaatnomasida «... biz O‘zbekistonni rivojlangan mamlakatga aylantirishni maqsad qilib qo‘ygan ekanmiz, bunga faqat jadal islohotlar, ilm-ma’rifat va innovatsiya bilan erisha olamiz..», deb ta’kidladilar. Universitetda ilm-fanni yangi bosqichga ko‘tarish, fundamental tadqiqotlar yaratish, yangi nazariyalarni shakllantirish uchun 2 ta ixtisoslik bo‘yicha fan doktorlari (DSc), 15 ta ixtisoslik bo‘yicha falsafa fanlari doktori (PhD) ilmiy darajalar beruvchi ilmiy kengashlar faoliyatining yo‘lga qo‘yilganligi ham fikrimiz isbotidir. Shu qisqa davr ichida ilmiy kengashlarda jami 98 ta dissertatsiya ishlari 100% ovoz bilan himoya qilinib, dissertantlarimiz falsafa fanlari doktori (PhD) diplomlarini qo‘lga kiritdilar. 21 nafar tadqiqotchilarimiz muddatdan oldin himoya shohsupasiga chiqdilar. Izlanuvchilar va ularning ilmiy rahbarlariga VMning 696-sonli qaror bilan 700 mln. so‘mga yaqin pul mukofotlari rag‘bat sifatida topshirildi. Dunyo tan olgan mamlakatlarning rivojlanish yo‘liga nazar tashlasak, ularning aksari ilm-fan taraqqiyoti va iqtidorli yoshlari hamda olimlari bilan shu darajaga yetganiga guvoh bo‘lamiz. Zero, buyuklar aytganidek, ilm yo‘li mashaqqatli yo‘ldir. U kishidan alohida qunt, katta matonat, sabr-bardoshni talab etadi. Shu ma’noda aytganda, O‘zbekistonimizda olimlarga bo‘lgan e’tibor, ko‘rsatilayotgan g‘amxo‘rlikning cheki yo‘q. Bu esa bizga kuch-quvvat bag‘ishlab, ulkan marralarni egallashga imkoniyat yaratmoqda. Bir qancha xalqaro oliy ta’lim dargohlari bilan hamkorlik shartnomalarini imzoladik. Ustozlarimiz, shogirdlarimiz tomonidan bir qator amaliy-fundamental loyihalar tadbiq etib kelinmoqda.Prezidentimiz oliy ta’lim tizimini butkul qayta ko‘rib chiqish, xususan, sohada belgilab berilgan ustuvor vazifalar ijrosiga alohida e’tibor qaratib kelmoqda. Bu masalalar mamlakatimizni 2021-yilgacha rivojlantirish bo‘yicha Harakatlar strategiyasida o‘z aksini topgan. Davlatimiz rahbarining “Pedagogik ta’lim sohasini yanada rivojlantirish chora-tadbirlari to‘g‘risida” 2020 yil 27 fevraldagi PQ -4623-sonli qaroriga muvofiq Buxoro davlat universitetining pedagogika ta’lim sohasi bakalavriat ta’lim yo‘nalishlari va magistratura mutaxassisliklari negizida Buxoro davlat universitetining Pedagogika instituti tashkil etilishi hamda Vazirlar Mahkamasining 2021 yil 6 apreldagi 188-sonli “Buxoro davlat universitetining Pedagogika instituti faoliyatini tashkil etish chora-tadbirlari to‘g‘risida”gi qarorlari ushbu yo‘nalishdagi islohotlarning mantiqiy davomi bo‘ldi, desak, aslo yanglishmaymiz. Yangilangan “Ta’lim to‘g‘risida”gi qonun ushbu soha taraqqiyotida, hech shubhasiz, yangi ufqlarni ochib berdi. Qonunga muvofiq, ta’lim olishning masofaviy, inklyuziv shakllari joriy qilindi, ta’lim tashkilotlariga xorijiy muassasalar bilan qo‘shma fakultet va o‘quv markazlari tashkil qilishga ruxsat etildi. Shuningdek, o‘qituvchilarga mualliflik dasturi va o‘qitish uslublarini joriy etish, zamonaviy pedagogik shakllar, o‘qitish va tarbiya usullarini erkin tanlash huquqi berildi. Biz keng ko‘lamli demokratik o‘zgarishlar, jumladan, ta’lim islohotlari orqali O‘zbekistonda yangi Uyg‘onish davri, ya’ni Uchinchi Renessans poydevorini yaratishni o‘zimizga asosiy maqsad qilib belgiladik. Zero, yurtboshimiz “biz maktabgacha ta’lim va maktab ta’limi, oliy va o‘rta maxsus ta’lim tizimi hamda ilmiy-madaniy muassasalarni bo‘lg‘usi Renessansning to‘rt uzviy halqasi, deb bilamiz. Bog‘cha tarbiyachisi, maktab muallimi, professor-o‘qituvchilar va ilmiy-ijodiy ziyolilarimizni esa yangi Uyg‘onish davrining to‘rt tayanch ustuni, deb hisoblaymiz”- deya aytilgan da’vatlari ustozlarmizga yana ilohiy kuch bag‘ishladi. Yana bir e’tirofli tomoni “Yangi O‘zbekiston strategiyasi” deb nomlangan Prezidentimizning yangi kitobida ustozlarimiz istiqbolli kelajagi uchun qator ustuvor vazifalar belgilab berilgan. Ta’lim va o‘qitish sifatini baholashning xalqaro standartlarini joriy etish asosida oliy ta’lim muassasalari faoliyatining sifati hamda samaradorligini oshirish, oliy ta’lim muassasalariga qabul kvotalarini bosqichma-bosqich ko‘paytirish; ilmiy-tadqiqot va innovatsiya faoliyatini rag‘batlantirish, ilmiy va innovatsiya yutuqlarini amaliyotga joriy etishning samarali mexanizmlarini yaratish, oliy o‘quv yurtlari va ilmiy-tadqiqot institutlari huzurida ixtisoslashtirilgan ilmiy-eksperimental laboratoriyalar, yuqori texnologiya markazlari va texnoparklarni tashkil etish ustoz-murabbiylarga bir qator imkoniyatlar eshigini ochib beradi. Aziz va muhtaram ustozlar! Vatanimiz ravnaqi yo‘lida kelajagimiz poydevori bo‘lgan yoshlarimizni ilmli, barkamol inson qilib tarbiyalashdek yuksak, mas’uliyatli va mashaqqatli kasbga umr yo‘llaringizni baxshida etayotganingizni behad qadrlayman hamda Sizdek oliyjanob, ziyoli insonlar bilan faoliyat ko‘rsatayotganimdan mamnunman. Yangi O‘zbekistonda ta’lim hamda ilm-fanning gullab-yashnashi va yuqori cho‘qqilarga erishishida bilim va tajribangiz, fidoiyligingiz, kuch-g‘ayratingiz, iqtidor va mahoratingizga ishonaman va suyanaman. Sizlarni qutlug‘ bayramingiz bilan yana bir bor chin yurakdan tabriklab, barchangizga sihat-salomatlik, baxtu saodat, mas’uliyatli va sharafli faoliyatingizda muvaffaqiyatlar, xonadonlaringizga fayzu baraka tilayman. Doimo farzandlaringiz, shogirdlaringiz, elu yurtimiz hurmati va ardog‘ida bo‘lish baxti nasib etsin, aziz ustozlar!BUXORO DAVLAT UNIVERSITETI REKTORI OBIDJON XAMIDOV XAFIZOVICH
