Qadim Buxoro ilm-u urfon, san'at, adabiyot, qadriyatning beshigidir. Asrlar oshgan madaniyat silsilasi bugunga qadar sayqal topib, rivojlandi. Bugun Buxoro davlat universitetining faollar yig'ingohida “Buxoro musiqa folklorining tarixiy- nazariy va amaliy masalalari” mavzusidagi Xalqaro ilmiy-amaliy konferensiya bo'lib o'tdi.Ushbu Xalqaro konferensiyada folklor san’atining olimlari, BuxDU professor-o`qituvchilari qatorida onlayn ravishda respublikamizning Toshkent, Nukus, Termiz, Urganch singari qator oliy o‘quv yurtlarining professor-o‘qituvchilari, mashhur xalq artistlari ishtirok etishdi. Shuningdek, Chelyabinsk Davlat madaniyat instituti olimlari, Fransiyaning O‘zbekistondagi elchixonasi ta’lim masalalari bo‘yicha hududiy maslahatchi Serj Bellini, Turkiyaning O‘zbekistondagi elchixonasi madaniyat va turizm masalalari bo‘yicha maslahatchisi Alparslan Akinji, Tyumen davlat universitetining Tobolsk pedagogika instituti dotsenti f.f.d Fayzullina Guzel Chaxvarovna hamda dotsent, f,f,n Faizova Liliya Xarisovna, Xalqaro Ahmad Yassaviy nomidagi Turk-Qozoq universiteti-Turkologiya tadqiqot instituti professori doktor Bulent Bayram, Turkiyaning Karabyuk universiteti tadqiqotchisi Asli Orunbayevlar hamda Yunus Rajabiy nomidagi O`zbek milliy musiqa san’ati instituti professori, O`zbekiston xalq artisti Munojotxon Yo`lchiyevalar ishtirok etishdi. Qolaversa, BuxDUning Musiqa ta’limi kafedrasi mudiri p.f.f.d PhD, dotsent T.I. Rajabov, p.f.n. professor B.X.Madrimov, p.f.n. professor S.D.Do`stov, dotsent O.I.Karimov, p.f.n. dotsent D.Y. Ro`ziyev, ushbu kafedraning katta o`qituvchisi Sh.U. Norovalar o`z ma’ruzalari bilan ishtirok etishdi.Konferensiya avvalida BuxDUning “San’atshunoslik” fakulteti professor-o`qituvchilari hamda talabalari ishtirokida Buxoroning qadim “Xinobandon” marosimi ijro etib berildi. Xushkayfiyatda boshlangan konferensiyani BuxDU rektori, iqtisodiyot fanlari doktori O.X.Xamidov samimiy dil so`zlari bilan ochib berdi:"Hurmatli anjuman ishtirokchilari! Ushbu xalqaro konferensiyaning Til bayrami va xalqimiz hayotidagi muhim siyosiy tadbir – saylovlar arafasida o‘tkazilayotganligi o‘ziga xos ramziy ma’no kasb etadi. Chunki Buxoro musiqa folklori ham o‘zligimizni namoyish etuvchi oyna, bu san’at namunalarida o‘zbek tilining serjilo ohanglari aks etgan. Shu ma’noda bugun ish boshlagan va bir necha shoʻbalarda davom etadigan konferensiya ishiga muvaffaqiyatlar tilayman!"“Buxoroda bo`lganimdan judayam mamnunman. Taassurotlarim benihoya katta. Fransiyada musiqa umumiy an’analar mahsuli sifatida qaraladi. Tashrifim davomida Buxorodagi marosimlardan namunalarni, o`zbek musiqa asboblarini ko`rib hayratim oshdi, kayfiyatim ko’tarildi va Fransiyada qadim cholg`u asboblariga e’tibor nechog`lik ekanligi, bugungi kunga qadar qay darajada saqlanganini o`zbek folklori bilan qiyosiy o`rganish kerakligi xayolimdan o`tdi. Konferensiyaga mei taklif etganlari uchun minnatdorchilik bildiraman,” – dedi Fransiyaning O‘zbekistondagi elchixonasi ta’lim masalalari bo‘yicha hududiy maslahatchi Serj Bellini o`z mamnuniyatini bildirib.Shundan so`ng , Yunus Rajabiy nomidagi O`zbek milliy musiqa san’ati instituti professori, O`zbekiston xalq artisti Munojotxon Yo`lchiyeva so`zga chiqib, Buxorodagi qadim musiqa san’ati hamda Buxoro musiqachilik maktabi vakillari xususida gapirdi.Ikki tilli zaminda yaratilgan va davrlar osha o‘zgarmay, tillardan tillarga, dillardan dillarga ko‘chib, kuylanib kelingan folklor musiqa san’atiga bag`ishlangan konferensiya zullisonaynlik an’anasini o‘zida ifoda etgan boy meros umrboqiyligi yo`lidagi navbatdagi qadam bo`ldi, desak aslo mubolag`a bo`lmaydi. BuxDU Matbuot xizmati
