Buxoro davlat universitetida 2020/2021 o‘quv yilida bitiruvchi talabalarning soni 3466 (466 nafar grant, 3000 nafar to‘lov-kontrakt) nafarni, jami talabalarning 15,7 %ni tashkil qiladi. Bakalavriat (kunduzgi) 2511 nafar (466 nafar grant, 2045 nafar to‘lov-kontrakt). Jumladan, joriy yilda 156 nafar (16 nafar grant, 140 nafar to‘lov kontrakt) talaba ta’lim muddati 3 yillik bo‘lgan Maktabgacha ta’lim yo‘nalishini bitirmoqda. Bakalavriat maxsus sirtqi shaklda 795 nafar, ikkinchi oliy ta’limda 160 nafar talaba universitetni tugatadi.Universitet bitiruvchilarining yakuniy davlat attestasiyasi bakalavriat yo‘nalishlari va magistratura mutaxassisliklari o‘quv jarayoniga muvofiq o‘tkazish bo‘yicha jadvali ishlab chiqilgan. YADA universitetdagi har bir ta’lim yo‘nalishi (mutaxassisligi) bo‘yicha yakuniy davlat attestasiya komissiyalari tashkil etilgan. Xorijiy til bo‘yicha YADA sinovi mazkur fanning davlat ta’lim standartida belgilangan zaruriy mazmunidan kelib chiqqan holda o‘quv dasturida nazarda tutilgan materiallarni talaba tomonidan o‘zlashtirilganlik darajasini aniqlashga yo‘naltirilgan bo‘lishi kerak. Yakuniy davlat attestasiyasini ixtisoslik fanlaridan (fanlararo) yakuniy davlat attestasiya sinovi yoki diplom loyihasi himoyasi yoxud bitiruv malakaviy ishi (magistrlik dissertasiyasi) himoyasi shaklida o‘tkazilishi bitiruvchilarning iqtidori, xohishi va ta’lim xususiyatidan kelib chiqqan holda oliy ta’lim muassasasi Kengashi qarori bilan belgilanadi. Oliy ta’lim muassasasi Kengashining qarori bilan bitiruvchi uchun belgilangan yakuniy davlat attestasiyasining shakli bir o‘quv yili davomida o‘zgartirilishiga yo‘l qo‘yilmaydi. Yetakchi professor-o‘qituvchilarni jalb etgan holda yakuniy davlat attestasiyasi sinovlarining dasturlari hamda baholash mezonlari ishlab chiqiladi hamda tayanch oliy ta’lim muassasasi bilan kelishgan holda universitet Kengashi tomonidan tasdiqlanadi va talabalar e’tiboriga yetkaziladi. Yakuniy davlat attestasiyasi komissiyasi raislari universitetda ishlamayotgan olimlar, ishlab chiqarishning yetakchi mutaxassislaridan iborat bo‘lib, bir yil (kalendar yil) muddatga tasdiqlanadi. Bir kishi ketma-ket bir oliy ta’lim muassasasida tegishli yo‘nalish (mutaxassislik) bo‘yicha ikki martadan ortiq yakuniy davlat attestasiyasi komissiyasining raisi bo‘lishi mumkin emas. Yakuniy davlat attestasiyasi komissiyalari tarkibi mutaxassis tayyorlovchi oliy ta’lim muassasasining ilmiy-pedagogik kadrlari (attestasiya komissiyasi umumiy tarkibining 50 foizigacha), shuningdek mazkur soha kadrlarining iste’molchilari bo‘lgan korxona, tashkilot va muassasalarning yuqori malakali mutaxassislari, turdosh oliy ta’lim muassasalarining yetakchi professor-o‘qituvchi va ilmiy xodimlari, O‘zbekiston Respublikasi Fanlar akademiyasi tizimidagi tegishli soha olimlaridan iborat tarkibda shakllantirildi.Yakuniy davlat attestasiya komissiyalari tarkibi kamida 5 nafar professor-o‘qituvchi va mutaxassislardan shakllantirildi. Fanlar dasturlarini o‘zlashtirishda katta yutuqlarga erishgan va o‘quv rejasidagi barcha fanlarning kamida 3/4 qismi bo‘yicha 86 ball va undan yuqori (5 baholik tizimda 5 baho (a’lo) o‘zlashtirish ko‘rsatkichlariga erishgan, (boshqa fanlar bo‘yicha o‘zlashtirish ko‘rsatkichi 71 balldan (5 baholik tizimda o‘zlashtirish ko‘rsatkichi 4 bahodan (yaxshi) kam bo‘lmagan), shuningdek, yakuniy davlat attestasiyasi sinovlari bo‘yicha kamida 86 ball (5 baholik tizimda 5 baho (a’lo) o‘zlashtirish ko‘rsatkichlariga ega bo‘lgan bakalavriat bitiruvchisiga «imtiyozli» diplom beriladi.Yakuniy davlat attestasiyasi sinovidan o‘ta olmagan shaxs o‘qish muddati tugagandan so‘ng, arizasiga muvofiq yakuniy davlat attestasiyasi sinovini keyingi yillarda qayta topshirish huquqiga ega. Yakuniy davlat attestasiyasi sinovidan qayta o‘ta olmagan talabaga akademik ma’lumotnoma beriladi va u o‘rnatilgan tartibda, to‘lov-kontrakt asosida tegishli kursga o‘qish uchun qayta tiklanishi mumkin. Uzrli sabab bilan yakuniy davlat attestasiyasi sinovlariga kelmagan talabalar rektorning buyrug‘i bilan yakuniy davlat attestasiya komissiyasining ishi yakunlanishiga qadar boshqa muddatlarda o‘tkaziladigan yakuniy davlat attestasiyasi sinovlariga kiritilishi mumkin. Yakuniy davlat attestasiyasi sinovlarida olgan bahosiga e’tiroz bildirgan bitiruvchilarning arizalarini ko‘rib chiqish uchun rektor buyrug‘i bilan apellyasiya komissiyasi tuziladi. Yakuniy davlat attestasiyasi jarayonida qo‘yilgan bahodan norozi bo‘lgan bitiruvchilar yakuniy davlat attestasiyasi baholari e’lon qilingan kundan e’tiboran uch kun muddat ichida apellyasiya komissiyasiga murojaat qilish huquqiga egadirlar. Apellyasiya komissiyasi o‘z xulosasini bitiruvchiga bir kun muddat ichida ma’lum qilishi lozim. Yakuniy davlat attestasiyasi komissiyasining ishi bo‘yicha yillik hisobot oliy ta’lim muassasasi Ilmiy kengashida ko‘rib chiqiladi.O‘zbekiston Respublikasi Vazirlar Maxkamasining 2020 yil 31 dekabrdagi “Oliy ta’lim muassasalarida ta’lim jarayonini tashkil etish bilan bog‘liq tizimni takomillashtirish chora-tadbirlari to‘g‘risida”gi 824-son qarori 5-bandi hamda OO‘MTVning 2021 yil 5 yanvardagi 7-sonli buyrug‘iga asosan oliy ta’lim muassasalarida tashkil etiladigan yakuniy davlat attestasiya komissiyasi raislari tegishli oliy ta’lim muassasasi rektorining buyrug‘i bilan tasdiqlanishi belgilab qo‘yilgan. Shuningdek, universitet rektorining 2021 yil 5 yanvardagi 18-U (01) sonli buyrug‘i ishlab chiqilgan. O‘quv rejalarga asosan kunduzgi shaklda tahsil olayotgan bitiruvchi kurs talabalarining 253 nafari (10%) bitiruv malakaviy ishlarini bajaradi. Universitet rektorining 2020 yil 9 sentyabrdagi 76-05-T sonli buyrug‘iga BMI mavzulari tasdiqlangan.BuxDU Matbuot xizmati
