Buxoro davlat universiteti “Потребитель Бухара плюс” telegram kanali orqali e’lon qilingan talabalar stipendiyasi to’loviga oid shikoyat xati mazmunini o’rgangan holda shuni ma’lum qiladiki, Buxoro davlat universitetida talabalarga stipendiya tayinlash va to’lab berish faoliyati O‘zbekiston Respublikasi Adliya vazirligi tomonidan 31.01.2020yil 59-son bilan ro’yxatdan o’tgan Vazirlar Mahkamasining “Oliy ta’lim muassasalari talabalariga to‘lanadigan stipendiyalar miqdorlarini belgilash hamda stipendiyalar tayinlash va to‘lash tartibini takomillashtirish chora-tadbirlari to‘g‘risida” qarorining 1-ilovasi hisoblangan “Oliy ta’lim muassasalari talabalariga stipendiyalar tayinlash va to‘lash tartibi to‘g‘risida nizomi” talablari asosida amalga oshiriladi. Ushbu nizom bo’yicha stipendiya tayinlash tartibi quyidagicha belgilangan:-Davlat granti asosida ta’lim oluvchi talabalarga o‘quv yilining 1-semestri yakuni bo‘yicha fanlardan o‘zlashtirish ko‘rsatkichlari (baholari) ma’lum bo‘lgunga qadar stipendiyaning bazaviy miqdorida stipendiya tayinlanadi va to‘lanadi. Bunda fanlardan o‘zlashtirish ko‘rsatkichlarining 30 foizi va undan ortiq qismi “qoniqarli” bo‘lgan talabalarga (to‘liq davlat ta’minotida bo‘lgan yetim bolalar va ota-ona qaramog‘idan mahrum bo‘lgan bolalar sirasiga kiruvchi hamda 1 va 2-guruh nogironligi bo‘lgan talabalar bundan mustasno) navbatdagi o‘quv semestri mobaynida stipendiya tayinlanmaydi. (2-bob, 5-bandi)- Davlat granti asosida ta’lim olayotgan, o‘quv semestri uchun o‘zlashtirish natijalari bo‘yicha uzrsiz sabablarga ko‘ra akademik qarzi (bir yoki undan ortiq fanlar bo‘yicha 55 foizdan kam reytingga) bo‘lgan oliy ta’lim muassasalarining talabalari keyingi o‘quv semestri oyining birinchi kunidan boshlab stipendiya olish huquqidan mahrum qilinadi. Belgilangan tartibda akademik qarzini bartaraf etgan (tegishli fanlar bo‘yicha 55 va undan ortiq foiz to‘plagan) va fanlardan o‘zlashtirish ko‘rsatkichlarining 30 foizdan kam qismi “qoniqarli” baho (reyting ko‘rsatkichi 71 balldan kam) bo‘lgan davlat granti asosida ta’lim olayotgan talabalarga stipendiya akademik qarzni bartaraf etish muddati tugaganidan keyingi oyning birinchi kunidan boshlab, stipendiyaning bazaviy miqdorida keyingi o‘quv semestriga qadar tayinlanadi. (8-bob, 23-24-bandlar)-To‘lov-kontrakt asosida ta’lim olayotgan talabalarga o‘z xohishlariga ko‘ra, kontrakt qiymatini stipendiyali yoki stipendiyasiz shaklda to‘lash huquqi beriladi. Stipendiyali to‘lov-kontrakt tarkibiga bazaviy stipendiya miqdorining yillik summasi kiritiladi hamda stipendiya yil mobaynida oyma-oy to‘lab boriladi. Oliy ta’lim muassasalarida stipendiyali to‘lov-kontrakt asosida ta’lim olayotgan talabalarga o‘quv semestri yakuni bo‘yicha fanlardan o‘zlashtirish ko‘rsatkichlaridan qat’i nazar bazaviy miqdordagi stipendiya tayinlanadi va to‘lanadi. Oliy ta’lim muassasalarida stipendiyali to‘lov-kontrakt asosida ta’lim olayotgan talabalarga stipendiyalar belgilangan tartibda ular tomonidan to‘lov-kontrakt summasi to‘langanidan keyin beriladi. (3-bob, 7-8-9-bandlari)-Belgilangan tartibda bir oliy ta’lim muassasasidan (fakultetdan) boshqasiga, shuningdek, ta’limning sirtqi shaklidan kunduzgi shakliga o‘tkazilgan talabalarga stipendiya ular tomonidan baholash (reyting nazorati) natijalari bo‘yicha, o‘quv rejalaridagi tafovutlar bartaraf etilganidan keyin tayinlanadi. Akademik qarz mavjud bo‘lmaganida stipendiya akademik ma’lumotnomada (reyting daftarchasida) ko‘rsatilgan, avvalgi o‘quv joyidagi baholash (reyting nazorati) natijalari bo‘yicha tayinlanadi va yangi o‘quv joyiga qayd etilgan paytdan boshlab oliy ta’lim muassasasi rektorining (filial direktorining) yoki uning vazifalarini bajaruvchi shaxsning buyrug‘i asosida to‘lanadi. (8-bob, 31-bandi)Ushbu nizomning 8-bob 22-bandiga asosan universitetda o‘quv yilida ikki marotaba stipendiya tayinlash komissiyasi faoliyati tashkillashtiriladi va stipendiya avvalgi semestr yakuniy nazorat natijalari e’lon qilinganidan so‘ng, har bir o‘quv semestri oyining birinchi kunidan boshlab tayinlanadi. 2020-2021 o’quv yili ikkinchi semestri uchun stipendiya tayinlash maqsadida 2021 yilning mart oyida stipendiya tayinlash komissiyasi faoliyati tashkillashtirilgan. Ushbu o’quv yilining 1-semestri yakunlari bo’yicha akademik qarzdorligi mavjud bo’lmagan va yuqoridagi nizomning 5-23-24 bandlarida ko’rsatilgan holatlar kuzatilmagan davlat granti asosida ta’lim oluvchi talabalarga stipendiyalari univeristet buxgalteriyasi tomonidan to’lab berilgan. Joriy o’quv yilining 2-semestri uchun stipendiyali to’lov-kontrakt asosida ta’lim oluvchi talabalarga shartnoma to’lovlarini o’z vaqtida amalga oshirgan bo’lsa, belgilangan tartib bo’yicha ushbu oyning oxiriga qadar kechiktirilmasdan joriy oy stipendiyasi to’lab berilishini ma’lum qilamiz. Bunda 2020-2021-o’quv yillari fevral-avgust oylari uchun bazaviy stipendiyaning oshirilgan qismini talabalar tomonidan o’z vaqtida to’lab berilganligi inobatga olinadi. Bugungi kunda universitetda xo’jalik faoliyatini yanada takomillashtirish maqsadida masofaviy “Uniwork” tizimi faoliyati tashkillashtirilayotganligi va tizim to’liq ishga tushgach universitet talabalari tomonidan doimiy tarzda har qanday qiziqtiruvchi savol va muammolarga tezkor javob olish imkoniyati yaratilishini ma’lum qilamiz.“Потребитель Бухара плюс” telegram kanali orqali e’lon qilingan talabalar stipendiyasi to’loviga oid shikoyat xati muallifi va shikoyat bo’yicha qo’chimcha ma’lumotlar e’lon qilinmaganligi sababli universitet ma’muriyati ushbu talabaga stipendiya to’lovlari tayinlanishi va amalga oshirilishi bo’yicha muammo sabablarini o’rganish maqsadida kanal ma’muriyati bilan hamkorlik munosabatlari o’rnatilishiga umid bildiradi. Buxoro davlat universiteti bu sohada ushbu kanal ma’muriyati bilan hamkorlik qilishga tayyorligi va kelajakda universitet faoliyatiga oid muammolarni yoritishda universitet ma’muriyati bilan hamkorlikda muammoni to’laqonli o’rgangan holda OAV va ijtimoiy tarmoqlarda e’lon qilinishini so’rab qoladi.
