O‘zbekiston Respublikasi Vazirlar Mahkamasi huzuridagi OAKning meyoriy hujjatlariga muvofiq Buxoro davlat universiteti va Qoraqalpoq davlat universitetlarida Matematikaning “Funksional analiz” sohasida olib borilayotgan ilmiy-tadqiqot natijalarini muhokama qilish, ilmiy seminar muhokamasiga qo‘yish, ularga taqrizlar berishni OAK talablari asosida amalga oshirish maqsadida 2020 yil may oyidan boshlab “Funksional analiz” haftalik Ilmiy seminari ZOOM platformasi orqali onlayn shaklda o’tkazilib kelinmoqda. Seminar rahbarlari: f.-m.f.d., prof. K.Kudayberganov (QQDU) va f.-m.f.n., dots. T.H.Rasulov (BuxDU).Seminar ishiga Malayziya Texnika Universiteti professori Muhiddin Mo‘minov, Shveysariya Federal Texnologiya Instituti postdoktorial tadqiqotchisi Orif Ibrogimov, Germaniyaning ULM universiteti doktoranti Ibrohimbek Akramov, Novosibrsk davlat universiteti magistranti Ibrohim Hasanov va yana ko‘plab xorijdagi nufuzli ta’lim muassasalarida faoliyat olib borayotgan O‘zbekistonlik tadqiqotchi olimlar taklif qilingan.“Funksional analiz” seminarining 2020-yil 14-avgustdagi yig‘ilishida Novosibirsrk davlat universiteti magistranti Ibrohim Hasanovning “Zaxarov-Shabatning to‘g‘ri spektral masalasi uchun analitik yechim” mavzusidagi ma’ruzasi muhokama qilindi. Seminarning ikkinchi qismida esa Germaniyaning ULM universiteti doktoranti Ibrohimbek Akramov ishtirokida “Germaniyaning Ulm va Hannover universitetlarida matematika ta’limi” mavzusida muloqot bo‘lib o‘tdi. Unda asosan o‘quv jarayonini kredit-modul tizimi orqali tashkil etish, Matematika ta’lim yo‘nalishlarida o‘qitiladigan fanlar, ilmiy-tadqiqotlarini olib borish mexanizmlari, universitetlarning xalqaro reytingga kirishi uchun qo‘yiladigan talablar hamda bu borada e’tibor qilinishi lozim bo‘gan dolzarb muammolar muhokama qilindi. Seminar ishtirokchilari o‘zlarini qiziqtirgan savollarga yetarlicha javob oldilar.
